“Müasir dövrdə gənclər arasında dini biliklərin formalaşması artıq təkcə ənənəvi mənbələrlə deyil, paralel olaraq rəqəmsal mühit və sosial şəbəkələr vasitəsilə də baş verir və bu, maarifləndirmə səviyyəsinə yeni tendensiyalar gətirir.”
Bu sözləri “Tehsil365”ə açıqlamasında Azərbaycan Qiymətləndiricilər Palatasının üzvü,mütəxəssis Süleyman Tağıyev bildirib.
Mütəxəssis qeyd edib ki, cəmiyyətin sürətli transformasiyası və informasiya texnologiyalarının geniş yayılması dini maarifləndirmə sahəsinə də təsir göstərir və məlumatın əlçatanlığının artması müsbət amil olsa da, səthi bilik problemini də ortaya çıxarır.
“İnternet resursları və sosial media gənclərə dini mövzular üzrə sürətli informasiya əldə etmək imkanı yaradır, lakin bir çox hallarda termin və anlayışlarla tanışlıq olsa da, onların elmi və tarixi əsasları barədə sistemli bilik formalaşmır”, — deyə o bildirib.
Onun sözlərinə görə, gənclər arasında dini mövzulara münasibət fərqlidir və onları maraq səviyyəsinə görə müxtəlif qruplara bölmək mümkündür.
“Bir qrup gənc dini bilikləri sistemli şəkildə öyrənir, digər qrup bunu mədəni-ənənəvi çərçivədə qəbul edir, bəzilərində isə bu mövzulara maraq zəif qalır. Bu da ümumi maarifləndirmə səviyyəsində fərqlərin yaranmasına səbəb olur”, — deyə o vurğulayıb.
Süleyman Tağıyev əlavə edib ki, müasir gənclər dini məsələlərə daha çox sual verərək yanaşır və bu, şüurlu dünyagörüş formalaşması baxımından müsbət tendensiya sayılsa da, qeyri-etibarlı mənbələrin təsiri riskini artırır.
“Peşəkar və sistemli dini təhsil, akademik yanaşma və mütəxəssis izahları bu sahədə balanslı bilik formalaşmasına kömək edir və sosial harmoniyanın qorunmasında mühüm rol oynayır”, — deyə o bildirib.
Sonda o, dünya müsəlmanlarını qarşıdan gələn Müqəddəs Ramazan ayı münasibətilə təbrik edərək hər kəsə bərəkət, mənəvi rahatlıq və duaların qəbul olunmasını arzulayıb.