Ramazan ayı ilə əlaqədar olaraq oruc ibadətinin mahiyyəti və qaydaları yenidən gündəmə gəlir. Bir çox insan üçün oruc sadəcə yemək və içməkdən imtina kimi başa düşülsə də, din alimləri bu ibadətin daha dərin mənəvi anlam daşıdığını bildirirlər.
Mövzu ilə bağlı ilahiyyatçı Cəmil Musayev “Tehsil365”ə açıqlama verib.
Cəmil Musayev bildirib ki, “Oruc yalnız fiziki aclıq deyil, insanın nəfsinə nəzarət etməsi və daxili tərbiyə prosesidir. Bu ibadət insanın səbir, mərhəmət və iradə keyfiyyətlərini gücləndirir.”
Onun sözlərinə görə, “Oruc tutan şəxs təkcə yemək və içməkdən deyil, eyni zamanda mənfi davranış və sözlərdən də uzaq durmalıdır. Əks halda orucun mənəvi tərəfi zəifləyə bilər.”
İlahiyyatçı qeyd edib ki, səhhəti ilə bağlı problemi olan şəxslər üçün dini qaydalarda müəyyən güzəştlər mövcuddur və bu məsələdə insanın sağlamlığı əsas götürülür.
Sonda Cəmil Musayev vurğulayıb ki, “Oruc ibadəti insanı həm fərdi, həm də sosial baxımdan formalaşdırır və cəmiyyətdə qarşılıqlı anlayışın güclənməsinə xidmət edir.”