Prezident İlham Əliyevin AMEA-nın 80 illik yubiley yığıncağında Azərbaycan dilinin saflığının qorunması və tariximizin inkişafı ilə bağlı müəyyənləşdirdiyi prioritetlər bütün alimlər üçün əsas istiqamət olmalıdır və bu yöndə fəaliyyət daha da genişləndirilməlidir.
AMEA-nın İctimai Elmlər Bölməsindən “Tehsil365"ə bildirilib ki, bu fikri Elmi şuranın növbəti iclasında AMEA-nın vitse-prezidenti vəzifəsini icra edən sədri akademik Gövhər Baxşəliyeva söyləyib.
İclasda A.A.Bakıxanov adına Tarix və Etnologiya İnstitutunun elmi katibi tarix üzrə fəlsəfə doktoru Bəhmən Əliyevin “Azərbaycan Respublikasının Prezidenti İlham Əliyevin tarixi nitqi: tarix və etnologiya elmlərinin qarşısında duran vəzifələr” mövzusunda məruzəsi dinlənilib.
Məruzədə qeyd olunub ki, dövlətimizin başçısının AMEA-nın 80 illik yubileyindəki çıxışında Dördüncü Sənaye İnqilabının əsas çağırışlarından olan süni intellekt, texnoloji inkişaf və kibertəhlükəsizliklə bağlı Azərbaycan elmi və Akademiya qarşısında vəzifələr qoyulub.
Bəhmən Əliyev vurğulayıb ki, dövlətimizin başçısı Azərbaycan tarix elminin inkişafını, onun konseptual problemlərinin həllini və obyektiv araşdırılmasını dövlət siyasətinin prioritetlərindən biri kimi müəyyən edib, tarixçiləri müasir metodologiyalara əsaslanan, həqiqətə söykənən fundamental əsərlər yazmağa çağırıb.
Məruzəçi, həmçinin qeyd edib ki, Azərbaycan etnologiya elmi milli-mənəvi dəyərlərin qorunması, zəngin mədəni irsin öyrənilməsi və beynəlxalq arenada tanıdılması istiqamətində müəyyən inkişaf yolu keçib. Azərbaycan etnologiya elmi qloballaşma və mədəni inteqrasiya proseslərinin gücləndiyi bir şəraitdə yeni çağırışlarla qarşılaşır. Bu vəziyyət etnologiyanın qarşısında həm nəzəri, həm də praktiki vəzifələr qoyur. Müasir Azərbaycan etnologiyası həm milli kimliyimizin qorunmasının, həm də qlobal mədəniyyətlərarası dialoqun elmi əsaslarının yaradılmasına xidmət edən strateji əhəmiyyətli bir sahə kimi inkişaf etməlidir.
İclasda Prezident İlham Əliyevin “Böyük Azərbaycan şairi Xaqani Şirvaninin 900 illik yubileyinin qeyd edilməsi haqqında” Sərəncamına dair Tədbirlər planının icra vəziyyəti haqqında da söz açılıb.
Sonra AMEA-nın İctimai Elmlər Bölməsinin elmi-tədqiqat müəssisələrinin keçirilməsi nəzərdə tutulan beynəlxalq və respublika səviyyəli elmi-təşkilati tədbirlərin, həmçinin institutlarda aparılacaq elmi-tədqiqat işlərinin planının təsdiq edilməsi haqqında müzakirələr olub.