Azərbaycanın Türkmənistandakı səfirliyi Türkmənistan Xarici İşlər Nazirliyinin Beynəlxalq Münasibətlər İnstitutunda keçirilən “Diplomatiya Günü”nə həsr olunmuş beynəlxalq sərgidə iştirak edib.
“Tehsil365" xəbər verir ki, sərgi çərçivəsində ölkəmizin zəngin tarixi irsi, mədəniyyəti, incəsənəti və turizm potensialını özündə əks etdirən edən nəşrlər nümayiş olunub.
“Made in Azerbaijan”, “Travel to Azerbaijan” və “WUF13” ilə bağlı broşürlər paylanılıb.
Tədbir iştirakçılarına Azərbaycanda “Şəhərsalma və Arxitektura İli” çərçivəsində Bakı şəhərində 17–22 may tarixlərində keçiriləcək Ümumdünya Şəhərsalma Forumunun 13-cü Sessiyası (WUF13), o cümlədən ölkəmizin davamlı urbanizasiya, inklüziv şəhər planlaşdırılması, dayanıqlı inkişaf hədəfləri və qlobal şəhərsalma gündəliyində artan rolu barədə ətraflı məlumatlar verilib.
Türkmənistan Nazirlər Kabinetinin sədr müavini, xarici işlər naziri Rəşid Meredov ölkə rəsmiləri və diplomatik korpus nümayəndələri ilə birlikdə Azərbaycan guşəsi ilə tanış olub. Sərgidə iştirak edən qonaqlar Azərbaycanla bağlı təqdimatlara böyük maraq göstərib.
Eyni zamanda, səfir Qismət Gözəlov sərgidə Türkmənistan mediasına müsahibə verib.