Fevralın 27-də Azərbaycan Bəstəkarlar İttifaqının Üzeyir Hacıbəyli konsert salonunda Xocalı soyqırımının 34-cü ildönümünə həsr olunmuş anım tədbiri keçirilib.
Bu barədə “Tehsil365"ə Bəstəkarlar İttifaqından məlumat verilib.
Bildirilib ki, İttifaqının katibləri Əməkdar incəsənət xadimi, professor Elnara Dadaşova çıxışında Xocalı faciəsindən 34 il ötməsinə baxmayaraq, o dəhşətli hadisələrin heç bir zaman yaddaşımızdan silinməyəcəyini vurğulayıb.
Sənətşünaslıq üzrə elmlər doktoru, dosent Leyla Zöhrabova Xocalı soyqırımının dəhşətlərindən danışıb və bu faciəsinin musiqidə təcəssümü ilə yanaşı, bu əsərlərin təbliğ olunmasının mühüm əhəmiyyət kəsb etdiyini vurğulayıb.
Əməkdar incəsənət xadimi, fəlsəfə elmləri doktoru, professor Gülnaz Abdullazadə “Xocalı filminin meydana gəlməsi və onun musiqi tərtibatı”, sənətşünaslıq üzrə fəlsəfə doktoru, dosent Güllü İsmayılova “Azərbaycan bəstəkarlarının yaradıcılığında Xocalı faciəsinin təcəssümü”, sənətşünaslıq üzrə fəlsəfə doktoru Humay Fərəcova-Cabbarova “Xocalı soyqırımı”nın tarixi aspektlərinin incəsənətdə təcəssümü” mövzusunda çıxış edərək, bu hadisənin təsirindən yaranmış - Azər Dadaşovun “Xocalıya ədalət” simfonik plakat, Faiq Nağıyevin “Xocalı harayı” rekviyem, Elnara Dadaşovanın orqan üçün “Xocalı laylası”, Tural Məmmədlinin kamança və piano üçün “Xocalıya ithaf”, Azad Zahidin “Rekviyem”, Nazim Quliyevin “Xocalı” operası, Aleksandr Çaykovskinin “Xocalı”, Balnur Kıdırbeyin simfonik orkestr üçün “Xocalı qurbanları” musiqi əsərlərindən söz açıblar.
Bədii hissədə unudulmaz bəstəkar Məmməd Quliyevin Simfoniya Rekviyemi (Ü.Hacıbəyli adına Azərbaycan Dövlət Simfonik Orkestri, Azərbaycan Dövlət Xor Kapellası (Bədii rəhbər və baş dirijor - Xalq artistləri Rauf Abdullayev, Gülbacı İmanova) və Azad Zahidin “Xocalı yol gözləyir” Rekviem kompozisiyası (söz: A.Qurbani. Azərbaycan Dövlət Televiziyası və Radiosunun Niyazi adına Simfonik Orkestr və C.Cahangirov adına xor. Dirijor – Əməkdar incəsənət xadimi N.Hacıəlibəyov. Xormeyster- Şəhla Ələkbərova) səsləndirilib.