Fevralın 28-də Sumqayıt şəhərində “Təhsildə yeni çağırışlar: keyfiyyətə baxış” regional təhsil konfransı keçirilib.
“Tehsil365” xəbər verir ki, fevralın 28-də Sumqayıt şəhərində “Təhsildə yeni çağırışlar: keyfiyyətə baxış” mövzusunda regional təhsil konfransı keçirilib. “Şəhərsalma və Memarlıq İli”nə həsr olunan tədbirdə “Təşkilati mədəniyyət” və “Məktəb mühitinin pedaqoji dizaynı” mövzuları müzakirə olunub.
Konfrans Məktəbəqədər və Ümumi Təhsil üzrə Dövlət Agentliyi, T–Network və Azərbaycan Gənc Müəllimlər Assosiasiyasının təşkilatçılığı, Elm və Təhsil Nazirliyi və Abşeron-Xızı Regional Təhsil İdarəsinin tərəfdaşlığı ilə baş tutub. Tədbirdə 300-dən çox təhsil işçisi iştirak edib.
Çıxış edən elm və təhsil nazirinin müavini Kənan Kərimzadə son 20 ildə 3600-dən çox məktəbin tikildiyini və ya əsaslı təmir olunduğunu bildirib. Onun sözlərinə görə, bu, məktəb fondunun təxminən 90 faizini əhatə edir və 1,3 milyon şagirdin təhsil şəraiti yaxşılaşdırılıb. 2020-ci ildə 900-ə yaxın şəraitsiz məktəb olduğu halda, hazırda bu say 400-ə enib.
Nazir müavini işğaldan azad olunmuş ərazilərdə 20-dən çox məktəbin fəaliyyət göstərdiyini və 4000-ə yaxın şagirdin təhsil aldığını vurğulayıb. O həmçinin qeyd edib ki, məktəblərin 80 faizi yüksək sürətli fiber-optik internetlə təmin olunub, kompüter təminatı isə 36 şagirdə 1 kompüterdən 7 şagirdə 1 kompüter səviyyəsinə yüksəlib. STEAM layihələri 300 minə yaxın, “Rəqəmsal bacarıqlar” platforması isə 500 mindən çox şagirdi əhatə edir.
OECD-nin Təhsil və bacarıqlar departamentinin direktoru Andreas Schleicher videomüraciətində davamlı inkişaf məqsədlərinə nail olunmasında müəllimlərin rolunu xüsusi vurğulayıb.
Milli Məclisin deputatı Mehriban Vəliyeva isə Prezident İlham Əliyev tərəfindən təsdiq edilmiş “Azərbaycan Mədəniyyəti – 2040” Konsepsiyasının əhəmiyyətindən danışıb, milli-mənəvi dəyərlər və müasir çağırışlar kontekstində təhsilin rolunu qeyd edib.
Konfransın əsas məqsədi qabaqcıl müəllim və təhsil idarəedicilərinin təcrübəsinin paylaşılması, regional əməkdaşlığın gücləndirilməsi və müzakirə platformasının yaradılması olub.