Naxçıvan Dövlət Universiteti nəzdində fəaliyyət göstərən İngilis dili Təmayüllü Gimnaziyanın komandası “Sabahın alimləri” XV Respublika Layihə Müsabiqəsinin final mərhələsində böyük uğura imza ataraq I yerə layiq görülüb və qızıl medal qazanıb.
Bu barədə “Tehsil365”ə Naxçıvan Dövlət Universitetindən məlumat verilib. Bildirilib ki, gimnaziyanın XI sinif şagirdləri Hüseyn Tahirov və Kənan Məmmədzadə müsabiqədə təqdim etdikləri “ReseptPlus” adlı innovativ layihə ilə münsiflər heyəti tərəfindən yüksək qiymətləndirilib. Layihənin elmi rəhbəri Naxçıvan Dövlət Universitetinin Tələbələrlə iş və tədbirlərin təşkili şöbəsinin müdiri, “Meliorasiya və ekologiya mühəndisliyi” kafedrasının müəllimi Hüseyn İmanovdur.
Bildirilib ki, bu il müsabiqəyə ümumilikdə 760 layihə təqdim olunub. Seçim mərhələsindən uğurla keçən 152 layihə (127 kollektiv, 25 fərdi) final mərhələsində iştirak edib. IX–XI sinif şagirdləri riyaziyyat, fizika və astronomiya, kimya, biologiya, tibb və sağlamlıq, ekologiya, mühəndislik, kompüter elmləri, robototexnika və süni intellekt daxil olmaqla 9 istiqamət üzrə layihələrini təqdim ediblər.
Qeyd edək ki, layihə müəlliflərindən Hüseyn Tahirov təhsil və olimpiada sahəsində qazandığı uğurlarla seçilir. O, 9-cu sinif üzrə ümumi orta təhsil haqqında attestat imtahanında 291 bal toplayaraq qırmızı attestata layiq görülüb.
Hüseyn Tahirov Dünya Robot Olimpiadasının Azərbaycan finalında “Robosports” kateqoriyası üzrə I yer qazanaraq Panama Respublikasında ölkəmizi təmsil edib. O, 10-cu sinifdə isə eyni kateqoriya üzrə yenidən I yerə layiq görülərək Türkiyədə keçirilən final mərhələsində Azərbaycanı təmsil edib. Həmin olimpiadada Azərbaycan 110 ölkə arasında 11-ci yeri tutub.
Şagird müxtəlif olimpiada və müsabiqələrdə də uğurlar əldə edib. Belə ki, o, Respublika Fənn Müsabiqəsində riyaziyyat üzrə IV yer, gimnaziyaya qəbul imtahanında Muxtar Respublika üzrə II yer qazanıb. Bundan başqa, STEAM sahəsində keçirilən layihələrdə 6 dəfə qalib olub, “STEAM Azerbaijan 2022” festivalında isə nominasiya üzrə II yerə layiq görülüb.
Eyni zamanda Hüseyn Tahirov informatika üzrə Respublika Fənn Olimpiadasında Naxçıvan üzrə ilk dəfə final mərhələsinə yüksələn şagird kimi də tarixə düşüb.
NDU nəzdində İngilis dili Təmayüllü Gimnaziyanın komandası qazandıqları bu böyük uğur münasibətilə təbrik olunur, onlara gələcək fəaliyyətlərində yeni nailiyyətlər arzulayırıq.
