İdman zalına getmək və ya şirniyyatdan tam imtina etmək kimi planlar çox vaxt həyata keçirilməsi çətin məqsədlər olur. Lakin həyat tərzində kiçik dəyişikliklər etmək daha real yanaşma sayılır. Məsələn, gündə cəmi 20 dəqiqə gəzmək sağlamlıq üçün əhəmiyyətli faydalar verə bilər.
“Tehsil365” xəbər verir ki, bu barədə "Parade" nəşri yazır.
Nəşr mütəxəssislərə istinadən gündəlik 20 dəqiqə gəzintinin orqanizmdə yarada biləcəyi beş əsas dəyişiklikdən bəhs edir.
Ürək-damar xəstəlikləri riski azalır
Sertifikatlı fərdi məşqçi Ellison Qoldsmitin sözlərinə görə, gəzinti ürək-damar sisteminin sağlamlığı üçün çox faydalıdır. Hətta gündə 20 dəqiqə gəzmək belə yüksək qan təzyiqi və ürək-damar xəstəlikləri riskini azalda bilər:
"Gəzinti qan dövranını yaxşılaşdırır və ümumi qan axınını artırır. Bu, həm də qan təzyiqini tənzimləməyə və arteriyalara düşən yükü azaltmağa kömək edir".
"Current Opinion in Cardiology" jurnalında dərc olunmuş elmi icmala görə, həftədə beş gün gündə 30 dəqiqə gəzmək ürək xəstəlikləri riskini 19 faiz azaldır. "Arteriosclerosis, Thrombosis, and Vascular Biology" jurnalında aparılan araşdırma isə göstərib ki, qaçış və gəzinti yüksək qan təzyiqi, xolesterin və diabet riskini azaltmaq baxımından oxşar dərəcədə effektivdir.
Beyin sağlamlığını dəstəkləyir
Mütəxəssislər bildirir ki, ürək üçün faydalı olan fəaliyyətlər adətən beyin üçün də faydalıdır. Gəzinti zamanı qan dövranı güclənir və beyin daha çox oksigen alır.
"Qan oksigen daşıyır və bu, neyronların daha yaxşı işləməsinə kömək edir. Nəticədə yaddaş və diqqət kimi koqnitiv funksiyalar yaxşılaşır. Qan həmçinin demensiya riskini azalda biləcək qida maddələrini də daşıyır", deyə Qoldsmit izah edib.
"GeroScience" jurnalında dərc olunan araşdırmaya görə, xüsusilə sürətli gəzinti demensiya və Altsheymer xəstəliyinin inkişaf riskini azalda bilər. Hətta gündə təxminən 3800 addım atmaq belə bu riski 25 faiz azalda bilər.
Sertifikatlı məşqçi Rene Motonun sözlərinə görə, beynə daha yaxşı qan axını immun və limfa sistemlərini də dəstəkləyir. Bu isə infeksiyalara qarşı qorunmanı gücləndirir. Bundan əlavə, gəzinti depressiya və narahatlıq riskinin azalması ilə də əlaqələndirilir.
Qanda şəkərin səviyyəsini tənzimləyir
Mütəxəssislərin fikrincə, xüsusilə yeməkdən sonra qısa gəzinti qanda şəkərin səviyyəsini nəzarətdə saxlamağa kömək edir.
"Yeməkdən sonra 60 dəqiqə ərzində edilən 10 dəqiqəlik gəzinti qanda şəkərin kəskin artmasının qarşısını alır. Gəzinti zamanı əzələlər enerji üçün qlükozadan istifadə edir və bu, daha az insulin tələb edir", deyə Qoldsmit bildirib.
Sümüklər və oynaqlar üçün faydalıdır
Yaş artdıqca sümüklərin və oynaqların sağlamlığını qorumaq üçün təkcə güc məşqləri deyil, gəzinti də vacib sayılır.
"Gəzinti az yüklənməli məşq növüdür və sümüklərin yenilənməsi prosesini stimullaşdırır. Ayaqların yerə toxunması bədənə köhnə sümük toxumasının yenilənməsi siqnalını verir və bu, sümük sıxlığını artıraraq sınıq riskini azaldır", deyə Qoldsmit bildirib.
Onun sözlərinə görə, gəzinti xüsusilə omba və ayaq sümükləri üçün faydalıdır. Hərəkət zamanı qan axını oynaqlara yönəlir, bu da oynaqların "yağlanmasına" və qığırdaq toxumasına qida maddələrinin çatdırılmasına kömək edir.
Ömrü uzada bilər
Mütəxəssislər qeyd edir ki, gəzinti sağlamlıq üçün o qədər faydalıdır ki, hətta ömrü uzada bilər.
Qoldsmit bildirib ki, dünyada insanların 100 ildən çox yaşadığı "mavi zonalar"ın ümumi xüsusiyyətlərindən biri gündəlik həyatın ayrılmaz hissəsi kimi gəzintinin olmasıdır.
"GeroScience" jurnalında dərc edilən araşdırmaya görə, gündə təxminən 4400 addım atmaq ümumi ölüm riskini orta hesabla 41 faiz azalda bilər.