Sumqayıt şəhərində yerləşən Heydər Əliyev Mərkəzində sosial iş sahəsinə həsr olunmuş maarifləndirici tədbir təşkil edilib.
"Tehsil365" xəbər verir ki, tədbir Sumqayıt Dövlət Texniki Kollecinin ingilis dili müəllimi Aygül Kərimovanın təşəbbüsü ilə baş tutub. Proqram çərçivəsində Aygül Kərimova və Rüfət İbrahimova məxsus sosial iş sahəsinə aid “Social work” adlı dərsliyin təqdimatı keçirilib, eyni zamanda sosial işçilərin peşə bayramı qeyd olunub. Çıxışlarda bu ixtisasın cəmiyyət üçün əhəmiyyəti geniş şəkildə izah edilib.
Tədbirin ssenarisi məhz sözügedən dərslik əsasında hazırlanıb ki, bu da proqramın həm elmi, həm də maarifləndirici məzmununa müsbət təsir göstərib.
Proqramda kollecin sosial iş ixtisası üzrə təhsil alan 713-9-24 qrupunun tələbələri fəal iştirak ediblər. Tələbələr sosial işin yalnız peşə deyil, həm də elmi istiqamət olduğunu vurğulayaraq, bu sahənin cəmiyyətin həssas qrupları ilə işləməkdə mühüm rol oynadığını bildiriblər. Onlar sosial işin humanizm, sosial ədalət və insan hüquqları prinsiplərinə əsaslandığını xüsusi qeyd ediblər.
Tədbirin maraqlı hissələrindən biri tələbələrin müəllimləri Aygül Kərimovanın rəhbərliyi ilə hazırladıqları səhnəcik olub. Səhnəcikdə sosial işçi ilə psixoloqun yanaşma fərqləri nümayiş etdirilib. Tamaşa zamanı psixoloqun fərdin psixoloji vəziyyətinə fokuslandığı, sosial işçinin isə problemin sosial mühit, ailə və cəmiyyət aspektlərini də nəzərə aldığı vurğulanıb.
Bundan əlavə, tədbirdə müasir texnologiyaların tətbiqi də diqqət çəkib. Tələbələr süni intellekt vasitəsilə hazırlanmış musiqi və rəqs təqdim edərək yaradıcılıq və innovasiyanı bir araya gətiriblər.
Tədbirin yüksək səviyyədə təşkili müəllim heyətinin əməyi ilə mümkün olub. Proqramın bütün detalları diqqətlə planlaşdırılıb.
Tədbirdə kollecin direktoru Əsəd Qurbanov, şöbə müdiri Samiddin Qasımov və digər müəllimlər iştirak ediblər. Qonaqlar arasında yer alan psixoloq-jurnalist Fəridə Musəvi çıxış edərək sosial iş sahəsinin əhəmiyyətindən danışıb, tələbələrin hazırladığı proqramı yüksək qiymətləndirib və onlara gələcək fəaliyyətlərində uğurlar arzulayıb.
