Onun qalibiyyətini bir neçə gün öncə məktəbdə şagird yoldaşları böyük coşqu ilə qarşılamışdılar. O, Türkiyənin Antalya şəhərində muay-tay idman növü üzrə keçirilən yarışda ikincilik əldə edən İlhamdır.
İlham Çıraqov 2012-ci ildə Bakıda doğulub. Əslən laçınlıdır. Hazırda Masazırda yerləşən Laçın rayon Çıraqlı kənd tam orta məktəbinin 8-ci sinfində oxuyur.
İlham 7 yaşından idmana maraq göstərir. Muay-tay idman növündə məşqlərə başlayır. Bu yolda ailəsi də ona dəstək olur. Gənc idmançı idmanla bərabər ali təhsil də almaq istəyir, o, 2-ci qrup üzrə “Maliyyə” ixtisasında təhsil almaq istəyir.
" İdman sahəsində ailə üzvlərimin dəstəyini hər an hiss edirəm. Atam Elgün Çıraqov peşəkar idmançı və beynəlxalq dərəcəli hakimdir. O, həmçinin mənim məşqçimdir. Yəqin ki elə mənim idman həvəsim buradan qaynaqlanır".
2019-cu ildən məşqlərə başlayan İlham muay-tay idman növü üzrə Azərbaycan çempionu, 2 dəfə Bakı şəhər çempionu, eləcə də uşu-sanda idman növü üzrə 2 dəfə Azərbaycan, 2 dəfə Bakı çempionu olub.
Uğurları ard-arda yaşayan məktəbli 2025 -ci ildə kunq-fu idman növü üzrə Azərbaycan çempionu tituluna da sahibdir.
" Bu günə qədər 40 döyüş keçirmişəm. Müxtəlif turnir və beynəlxalq səviyyəli yarışların qalibi, həmçinin mükafatçısı olmuşam. Mənimlə bərabər həyəcan keçirən ailə üzvlərim var. Hətta bəzən onların məndən daha həyəcanlı olduğunu deyə bilərəm.
Yarışlarımın birində televiziyadan məni izləyən nənəm göz yaşlarını saxlaya bilməyib. Bütün yarışı anban izləyib. Mən bu hadisəni sonra evdəkilərin çəkdiyi videodan gördüm"./
Laçın məktəblisi son dəfə 30-a yaxın ölkənin idmaçısının qatıldığı yarışda cəmi 40 saniyəlik döyüşlə yarımfinala yüksəlib.
" 25-29 mart tarixlərində Türkiyənin Antalya şəhərində muay-tay idman növündə açıq beynəlxalq kubok üzrə yarış təşkil olunmuşdu. Avropa Muay-tay Federasiyasının təşkilatçısı olduğu turnirdə ikincilik əldə etdim. İlk döyüşüm 40 saniyə çəkdi, yarımfinalda qırğızıstanlı idmançını nokaut edib finala yüksəldim. Finalda isə yerli rəqiblə qarşı-qarşıya gəldim. Bəzən gözlənilməz qərarlar da olur. Amma ruhdan düşmək lazım deyil".
Avropa ikincisi olan İlham deyir ki, əsas məqsədi vətəninə ,dövlətinə, xalqına xidmət etmək, bayrağımızı başqa ölkələrdə qürurla dalğalandırmaqdır:
"Yarışa getməmişdən əvvəl demişdim ki, mən qələbəylə geri dönəcək və bu döyüşümü şəhidlərimizə həsr edəcəyəm. Sözümdə durdum".
Döyüşdən qalib çıxanda bir çox ölkələrin arasında komandamızın "Azərbaycan, Azərbaycan", - deyə sədalarını yüksəltməsi, bayrağımızın başımın üstündə dalğanlaması, təltif edilmək - bir idmançı üçün bundan gözəl hiss yoxdur, məncə. İnanıram ki, bundan sonra nailiyyətlərim daha da artacaq.