İlahiyyatçı Əkrəm Həsənov dindən uzaqlaşma mövzusunun mürəkkəb və çoxşaxəli olduğunu bildirib.
“Bu mövzu kifayət qədər problemli və çoxsəbəblidir. İnsanların dindən uzaqlaşmasının tək bir səbəbi yoxdur. Bəziləri bunu dini mətnlərin müasir dövrlə uyğun olmaması, bəziləri isə dini yaşayan insanların davranışları ilə əlaqələndirir. Amma əslində məsələ bundan daha dərindir və insanın daxili dünyası, cəmiyyətin təsiri və dinin təqdim olunma forması ilə sıx bağlıdır”, – deyə o qeyd edib.
Əkrəm Həsənovun “Tehsil365”ə açıqlamasına görə, insan fitrətən inam meyli ilə doğulur, lakin bu meyl zamanla müxtəlif təsirlər nəticəsində zəifləyə və ya istiqamətini dəyişə bilər.
İlahiyyatçı bildirib ki, dini yanaşmada əsas problemlərdən biri dinin özü deyil, onun insanlara necə çatdırılmasıdır. Onun sözlərinə görə, insanlar çox vaxt dini mənbələrdən deyil, dini təmsil edən şəxslərdən təsirlənir.
“Əgər burada səmimiyyət yoxdursa, sözlə əməl arasında fərq varsa, bu, xüsusilə gənclər arasında narazılıq yaradır. Bir çox hallarda insanlar dinə deyil, din adı ilə təqdim olunan yanlışlara qarşı çıxırlar”, – deyə Əkrəm Həsənov vurğulayıb.
Ekspert əlavə edib ki, müasir dövrdə elm və din arasında süni qarşıdurma yaradılıb. Halbuki tarixdə bir çox alimlər elmi Yaradanı tanımağın bir yolu kimi qəbul ediblər və dini mənbələr də insanı düşünməyə, araşdırmağa təşviq edir.
Onun fikrincə, insanların dindən uzaqlaşmasının səbəblərindən biri də həyatdakı çətinlikləri dinlə əlaqələndirmələridir. Gözlədiyi nəticəni əldə etməyən insan zamanla məyus olur və inamı zəifləyə bilir. Halbuki dini baxışa görə, həyat sınaqlarla müşayiət olunur və bu, təbii prosesdir.
Əkrəm Həsənov həmçinin qeyd edib ki, bu gün bir çox insan dini bilikləri sosial şəbəkələrdən əldə edir və bu məlumatlar çox vaxt kontekstdən çıxarılmış, natamam formada təqdim olunur. Bu isə yanlış nəticələrə səbəb olur.
İlahiyyatçı sonda vurğulayıb ki, insanın daxilində hər zaman məna axtarışı mövcuddur və bu ehtiyac düzgün şəkildə qarşılanmadıqda fərqli istiqamətlərə yönələ bilər. Onun sözlərinə görə, din insanlara çətinlik kimi deyil, yol və istiqamət kimi təqdim olunmalıdır.
“İnsanların dindən uzaqlaşması əksər hallarda dinin özündən deyil, onun yanlış anlaşılması, yanlış təqdim olunması və insanın daxili suallarına cavab tapmaması ilə bağlıdır. Din qorxu ilə deyil, anlayışla izah olunmalıdır. Çünki iman məcburiyyətlə yox, dərk olunmaqla möhkəmlənir”, – deyə o fikrini yekunlaşdırıb.