Azərbaycan Milli Elmlər Akademiyasının (AMEA) Naxçıvan Bölməsinin təşkilatçılığı ilə 26–28 iyun 2026-cı il tarixlərində Naxçıvan şəhərində “Şəhərsalma və Memarlıq İli” çərçivəsində və dahi memar Əcəmi Naxçıvaninin 900 illik yubileyi münasibətilə beynəlxalq elmi konfrans keçiriləcək.
“Tehsil365“ xəbər verir ki, “Əcəmi Naxçıvani: Naxçıvan memarlıq məktəbi və ənənələri” mövzusuna həsr olunan konfrans həm ənənəvi, həm də onlayn formatda təşkil ediləcək. Tədbir memarlıq, tarix və mədəni irs sahələrində çalışan yerli və xarici tədqiqatçıları bir araya gətirəcək.
Konfrans çərçivəsində Əcəmi Naxçıvaninin dövrü və yaradıcılığı, onun memarlıq və mühəndislik irsi, Yaxın Şərq memarlığına təsiri, Naxçıvan memarlıq məktəbi və onun nümayəndələri, eləcə də orta əsrlərdə Naxçıvanın şəhər mədəniyyəti, dili, ədəbiyyatı və folkloru kimi mühüm mövzular müzakirə olunacaq. Həmçinin Möminə xatın türbəsi memarlıq irsinin nadir nümunəsi kimi ayrıca tədqiq ediləcək.
Konfransda iştirak üçün təqdim edilən məqalələr 25 may 2026-cı il tarixinədək qəbul olunacaq. Müraciətlər elmi yenilik, aktuallıq və tədqiqat əhəmiyyətinə görə qiymətləndiriləcək. Seçilmiş məqalələrin müəlliflərinə 31 may 2026-cı il tarixinədək nəticə barədə məlumat veriləcək.
Təşkilat Komitəsinin məlumatına görə, qəbul edilən iştirakçıların qonaqlama xərcləri qarşılanacaq. Konfransda hər bir məruzə üçün 15 dəqiqəlik təqdimat vaxtı ayrılıb.
Əlavə məlumat üçün AMEA Naxçıvan Bölməsinə müraciət etmək mümkündür.