“Məqsəd qoymaq öyrənməyə çox güclü şəkildə təsir edir. Çünki məqsəd insanın motivasiyasına, diqqətinə və davranışının istiqamətinə birbaşa təsir göstərir. İnsan ‘niyə öyrənirəm?’ sualına cavab tapdıqda beyin bunu daha vacib qəbul edir və diqqət səviyyəsi artır”
Psixoloq Nabat Mirzəyeva “Tehsil365”ə açıqlamasında bildirib ki, məqsəd qoymaq insanın öyrənmə prosesinə güclü təsir göstərir və motivasiya, diqqət və davranışın istiqamətlənməsində əsas rol oynayır.
Onun sözlərinə görə, məqsədsiz öyrənmə çox vaxt dağınıqlığa və diqqət zəifliyinə səbəb olur.
“Məqsədsiz şəkildə öyrənən insanlarda daha çox dağınıqlıq müşahidə olunur. Amma konkret və real məqsədlər qoyulduqda motivasiya güclənir və hər kiçik nailiyyət insanda əlavə enerji yaradır”, – deyə o bildirib.
Nabat Mirzəyeva əlavə edib ki, məqsəd insanın daxili motivasiya sistemini gücləndirən mühüm psixoloji amildir.
“Məqsəd bir növ motivasiya mühərrikidir. İnsan yorulduqda belə məqsədi xatırlayır və bu, onu davam etməyə sövq edir. Kiçik uğurlar isə ‘bacarıram’ hissini formalaşdıraraq daha böyük hədəflərə aparır”, – deyə psixoloq vurğulayıb.
O qeyd edib ki, məqsədli öyrənmə prosesi sadəcə məlumat toplamaqdan çıxaraq şüurlu və yönlü inkişaf mərhələsinə çevrilir.
“Nəticə olaraq, məqsəd qoymaq öyrənməni daha fokuslu, daha motivasiyalı və daha davamlı bir prosesə çevirir”, – deyə Nabat Mirzəyeva fikrini yekunlaşdırıb.