AMEA-nın prezidenti akademik İsa Həbibbəyli Rumıniyanın Yassı şəhərində fəaliyyət göstərən Petre Andrei Universitetinin rektoru, Rumıniya Akademiyasının “Vasile Conta” mükafatı laureatı, dosent Sorin Bokançanın rəhbərlik etdiyi nümayəndə heyəti ilə görüş keçirib.
AMEA-dan “Tehsil365” ə bildirilib ki, görüş zamanı akademik İsa Həbibbəyli Azərbaycan ilə Rumıniya arasında müxtəlif sahələrdə mövcud əlaqələrin yüksək səviyyədə inkişaf etdiyini vurğulayıb. O, xüsusilə elm və təhsil sahəsində əməkdaşlığın genişləndirilməsinin vacibliyini qeyd edərək, artıq AMEA-nın Rumıniyanın bir universiteti ilə elmi əməkdaşlıq müqaviləsinin mövcud olduğunu diqqətə çatdırıb. AMEA rəhbəri universitetlərlə yanaşı, Rumıniya Elmlər Akademiyasının elmi-tədqiqat institutları ilə də əlaqələrin qurulmasının əhəmiyyətini vurğulayıb. Birgə elmi konfransların təşkili, kitabların nəşri, elmi məqalələrin qarşılıqlı mübadiləsi kimi təşəbbüslərin perspektivli istiqamətlər olduğunu bildirib və bu görüşün gələcək əməkdaşlıq üçün stimul yaradacağını ifadə edib.
Rektor Sorin Bokança rəhbərlik etdiyi ali məktəbin tarixi və fəaliyyət istiqamətləri barədə məlumat verib. O, aprelin 22-də Qarabağ Universitetində “Polis” elmi jurnalının Azərbaycana həsr olunmuş xüsusi buraxılışının təqdimat mərasiminin keçirildiyini qeyd edib. Rektor AMEA və Azərbaycan universitetləri ilə elmi əməkdaşlıq əlaqələrinin inkişafında maraqlı olduqlarını vurğulayıb.
“Polis” jurnalının icraçı direktoru dosent Sabin Draqulin çıxış edərək nəşrin tarixi, elmi məqalələrin qəbul prinsipləri və beynəlxalq fəaliyyət istiqamətləri haqqında ətraflı məlumat verib. Bildirib ki, jurnal rumın, ingilis, alman və italyan dillərində nəşr olunur və beynəlxalq elmi ictimaiyyətdə tanınır. O, Azərbaycan alimlərini də jurnalla əməkdaşlığa dəvət edib.
Görüş çərçivəsində “Polis” jurnalının Azərbaycana həsr edilmiş xüsusi buraxılışı akademik İsa Həbibbəyliyə təqdim olunub.
Sonda nümayəndə heyəti AMEA-nın Rəyasət Heyətinin binası ilə tanış olub, onlara binanın tarixi barədə məlumat verilib.