Azərbaycan Dillər Universiteti-nin Fransız dilinin leksikologiyası və üslubiyyatı kafedrasının müdiri, filologiya elmləri doktoru, professor Gülnarə Sadıxova-nın təşəbbüsü ilə 122r qrup tələbələrinin iştirakı əsasında Xəzər dənizinin sahilində açıq havada qeyri-adi dərs təşkil olunub.
“Tehsil365” xəbər verir ki, açıq havada keçirilən bu dərs həm nəzəri, həm də praktiki baxımdan əhəmiyyət kəsb edib. Dərs zamanı tələbələr fransız dili üzrə biliklərini təkmilləşdirməklə yanaşı, Xəzər dənizi-nin mövcud ekoloji vəziyyətini yaxından müşahidə etmək imkanı əldə ediblər.
Tədris prosesindən dərhal sonra professor və tələbə heyəti “Xəzəri təmiz saxlayaq!” şüarı ilə ekoloji aksiyaya başlayıblar. Sahilboyu ərazidə olan plastik qablar, şüşə tullantıları və digər məişət tullantıları toplanaraq ərazidən uzaqlaşdırılıb.
Qeyd olunub ki, bu təşəbbüs müasir pedaqoqun tələbəyə təkcə elmi bilikləri deyil, eyni zamanda vətəndaşlıq mövqeyi, vətənə sevgi və ətraf mühitə məsuliyyətli yanaşma kimi dəyərləri də aşıladığını nümayiş etdirir.
Dəniz kənarında keçirilən bu “canlı dərs” tələbələrin yaddaşında dərin iz buraxmaqla yanaşı, Xəzərin qorunmasına yönəlmiş kiçik, lakin mənalı bir addım kimi qiymətləndirilib.
Bildirilir ki, Xəzər dənizinin xilası üçün böyük dövlət layihələri ilə yanaşı, belə fərdi və akademik təşəbbüslərə də ciddi ehtiyac vardır. Bir professor və bir qrup tələbənin birgə həyata keçirdiyi bu aksiya, gələcəyin daha təmiz mühitinə olan inamın göstəricisi kimi vurğulanıb.
Eyni zamanda qeyd edilib ki, Xəzər dənizi yalnız təbii obyekt deyil, həm də ölkənin tarixi, iqtisadiyyatı, mədəniyyəti və gələcəyi üçün mühüm əhəmiyyət kəsb edir. Hazırda Xəzər sahillərində müşahidə olunan çirklənmə və dayazlaşma hər kəsi düşündürür və bu istiqamətdə əsas işlərdən biri gənc nəslin maarifləndirilməsidir.
