Axşam saatlarında içilən bir fincan kofe uzanan işləri tamamlamaq və ya qısa müddətli yorğunluğu aradan qaldırmaq üçün yaxşı üsul kimi görünə bilər. Elmi məlumatlar göstərir ki, yatmazdan əvvəl kofe içmək o qədər də zərərli deyil, xüsusilə də oyaq qalmaq üçün enerji lazımdırsa. Lakin bu enerji artımı bəzi qeyri-adi nəticələrə də səbəb ola bilər.
“Tehsil365“ xəbər verir ki, yeni araşdırma göstərib ki, gecə kofein qəbul etmək impulsiv davranışlara və riskə meyilliliyin artmasına səbəb ola bilər. Xüsusilə, ABŞ-ın Texas Universitetinin El-Paso kampusunun tədqiqatçıları gecə vaxtı kofeinin təsirini meyvə milçəkləri üzərində araşdırıblar. İstifadə olunan bu növ genetik və sinir sistemi baxımından insanlara müəyyən qədər bənzəyir. Aparılan eksperimentlər göstərib ki, gecə kofein qəbul edən milçəklər daha qeyri-sabit davranış nümayiş etdiriblər.
Tədqiqatçı Erik Saldes bildirib: "Normal şəraitdə milçəklər güclü hava axını zamanı hərəkəti dayandırırlar. Lakin gecə kofein qəbul edən milçəklər bu reaksiyanı zəif göstərir, impulsiv davranır və xoşagəlməz şəraitə baxmayaraq nəzarətsiz uçuşlar edirlər".
Bundan əlavə, eksperimentlər zamanı dişi milçəklərin, eyni miqdarda kofein qəbul etmələrinə baxmayaraq, erkəklərə nisbətən daha impulsiv davrandıqları müşahidə olunub. Tədqiqat qrupunun üzvü, biologiya elmləri professoru Kyon-An Han qeyd edib: “Milçəklərdə estrogen kimi insan hormonları yoxdur. Bu isə dişilərdə müşahidə olunan yüksək həssaslığın başqa genetik və ya fizioloji faktorlarla bağlı olduğunu göstərir".
Bu nəticələr gecə kofe içməyin insanlarda, xüsusilə də qadınlarda impulsiv davranışlara necə təsir etdiyini izah etməyə kömək edə bilər. Lakin yekun nəticələr üçün əlavə araşdırmalara ehtiyac var.