Ulu Öndər Heydər Əliyev 10 may 1923-cü ildə Naxçıvan şəhərində dünyaya göz açmışdır. Heydər Əliyev Azərbaycan xalqının tarixində müstəsna xidmətləri ilə əbədiyaşarlıq qazanan böyük dövlət xadimidir. O yalnız siyasi lider kimi deyil, həm də milli birliyin, dövlətçilik ideologiyasının və müstəqil Azərbaycanın rəmzi kimi xalqın yaddaşına həkk olunmuşdur. Onun həyat yolu Vətənə bağlılığın, xalqa xidmətin və böyük liderlik məktəbinin parlaq nümunəsidir.
Heydər Əliyevin siyasi fəaliyyəti Azərbaycanın taleyi ilə sıx bağlıdır. O, ölkənin ən çətin və mürəkkəb dövrlərində xalqının yanında olmuş, dövlətçiliyin qorunması naminə böyük fədakarlıqlar göstərmişdir. Ulu Öndərin rəhbərliyi dövründə Azərbaycanda sabitlik yaradılmış, qanunçuluq möhkəmləndirilmiş və iqtisadi inkişaf üçün mühüm addımlar atılmışdır. Ümummilli Liderin ən mühüm xüsusiyyətlərindən biri onun güclü idarəçilik və strateji düşüncə qabiliyyəti idi. O, gələcəyi görməyi bacaran uzaqgörən siyasətçi kimi Azərbaycanın inkişaf yolunu müəyyənləşdirmişdir. Dövlət idarəçiliyində qətiyyətli olması ilə yanaşı, xalqın problemlərinə həssas yanaşması Heydər Əliyevi milyonların sevimli liderinə çevirmişdi.
Ulu Öndər həm də qüdrətli diplomat idi. O, Azərbaycanın beynəlxalq aləmdə tanınması və mövqeyinin möhkəmlənməsi üçün yorulmadan çalışmışdır. Xarici siyasətdə balanslı və düşünülmüş addımlar ataraq ölkəmizin maraqlarını hər zaman ön planda saxlamışdır. Onun təşəbbüsü ilə həyata keçirilən böyük enerji layihələri Azərbaycanın iqtisadi qüdrətini artırmış və ölkəmizin strateji əhəmiyyətini yüksəltmişdir. Ümummilli Liderin insanlara münasibəti də xüsusi idi. Sadəliyi, səmimiyyəti və yüksək nitq mədəniyyəti ilə seçilən Heydər Əliyev insanlarla ünsiyyətdə hər zaman diqqətli və qayğıkeş davranırdı. Onun çıxışları xalqda böyük ruh yüksəkliyi yaradır, insanları gələcəyə inamla baxmağa səsləyirdi.
Bu gün müasir Azərbaycanın qazandığı uğurların əsasında məhz Ulu Öndər Heydər Əliyevin müəyyən etdiyi inkişaf strategiyası dayanır. Millətin yaddaşına həkk olunan Şəxsiyyət olan Heydər Əliyev daim hörmət və ehtiramla anılır. Onun zəngin siyasi irsi, dövlətçilik fəlsəfəsi və xalqına sonsuz sevgisi gələcək nəsillər üçün də örnək olaraq yaşayacaqdır.
Azərbaycan Dövlət Pedaqoji Universitetinin müəllimi, gənc alim Osman Azadoğlu