Bakı Slavyan Universitetinin (BSU) “Müasir Dillər” layihəsi çərçivəsində Lənkəran-Astara Regional Təhsil İdarəsi ilə birgə təşkil etdiyi Xarici Dil Müəllimlərinin III Regional Forumu Lənkəran şəhərində keçirilib.
“Tehsil365" xəbər verir ki, Forumda Lənkəran-Astara Regional Təhsil İdarəsinin tabeliyində fəaliyyət göstərən ümumtəhsil məktəblərinin xarici dil müəllimləri, təhsil mütəxəssisləri və akademik heyət iştirak edib. Tədbir xarici dil tədrisində müasir yanaşmaların müzakirəsi üçün mühüm platforma rolunu oynayıb.
Forum çərçivəsində xarici dil tədrisinin aktual problemləri, innovativ metodların tətbiqi, müəllim hazırlığının keyfiyyətinin artırılması və tədris texnologiyalarının inkişafı istiqamətində fikir mübadiləsi aparılıb.
Tədbirdə çıxış edən BSU-nun rektoru Anar Nağıyev bildirib ki, universitet əsasən pedaqoji kadr hazırlığı istiqamətində fəaliyyət göstərsə də, onun fəaliyyəti daha geniş sahələri əhatə edir. Rektor qeyd edib ki, universitetdə 11 dil üzrə müxtəlif ixtisaslarda kadr hazırlığı həyata keçirilir.
Anar Nağıyev vurğulayıb ki, Regional Xarici Dil Müəllimləri Forumunun əsas məqsədi müəllimlərin məktəblərdə daha effektiv və səmərəli fəaliyyət göstərə bilməsi üçün mövcud ehtiyacların müəyyənləşdirilməsidir. O əlavə edib ki, bu görüşlər vasitəsilə ümumtəhsil məktəblərində çalışan müəllimlərin müasir dövrün tələbləri, tədris texnologiyaları və ehtiyac duyulan bilik-bacarıqlarla bağlı fikirlərinin öyrənilməsi nəzərdə tutulur.
Rektor, həmçinin müəllimlərlə ali təhsil müəssisələri arasında davamlı əməkdaşlığın və peşəkar şəbəkələşmənin formalaşdırılmasının vacibliyini diqqətə çatdırıb. O, müəllim peşəsinin cəmiyyətdəki rolundan danışaraq Azərbaycan müəlliminin ölkənin inkişafında mühüm missiya daşıdığını bildirib.
Rəhim Rəhimov isə çıxışında forumun əhəmiyyətini vurğulayaraq, belə platformaların müəllimlərin peşəkar inkişafına və tədris keyfiyyətinin yüksəldilməsinə mühüm töhfə verdiyini qeyd edib.
Daha sonra forumda iştirak edən xarici dil müəllimləri çıxış edərək tədris prosesi ilə bağlı fikir və təkliflərini səsləndiriblər.
Tədbir qarşılıqlı müzakirələrlə davam edib.
