Azərbaycan Respublikasının Gənclər Fondunun dəstəyi ilə 2019-cu ildən həyata keçirilən və artıq ənənə halını alan “Səyyar Gənclər Xidməti” layihəsinin 2026-cı il üzrə ilk dayanacağı Şəki şəhəri olub. Bu il Gənclər Fondunun yaradılmasının 15 illiyinə həsr olunan layihə “Gənclərlə, gənclər üçün” şüarı altında reallaşdırılır.
"Tehsil365" xəbər verir ki, layihənin əsas məqsədi dövlət gənclər siyasəti çərçivəsində yaradılan imkan və xidmətlərin, xüsusilə məşğulluq, innovasiya və rəqəmsallaşma sahələrində həyata keçirilən təşəbbüslərin regionlarda yaşayan gənclər üçün əlçatanlığını artırmaqdır. Bununla yanaşı, ucqar kəndlərdə yaşayan gənclərin ictimai fəallığının yüksəldilməsi, dövlətçilik ənənələrinin təbliği, şəxsi və peşəkar inkişafına yönəlmiş təlim, seminar və görüşlərin təşkili də layihənin əsas hədəflərindəndir.
İyunun 23-də Şəki şəhərində keçirilən açılış mərasimi Dövlət Himninin səsləndirilməsi və ölkəmizin suverenliyi uğrunda canından keçən şəhidlərin əziz xatirəsinin bir dəqiqəlik sükutla yad edilməsi ilə başlayıb.
Açılış mərasimində Azərbaycan Respublikasının Gənclər Fondunun icraçı direktoru vəzifəsini icra edən Yusif Vəliyev, Şəki Şəhər İcra Hakimiyyəti başçısının müavini – Ərazi-təşkilat və ictimai-siyasi məsələlər şöbəsinin müdiri Xəyalə Töhrablı, Gənclərin İnkişaf və Karyera Mərkəzinin Baş direktoru Azər Əliyev və Vətən müharibəsi qazisi Mustafa Novruzlu iştirak ediblər.
Rəsmi çıxışlar zamanı layihənin region gəncləri üçün əhəmiyyətindən bəhs olunub. Bildirilib ki, layihə gənclərin hərtərəfli inkişafına, bilik və bacarıqlarının artırılmasına, ictimai fəallığının yüksəldilməsinə və inkişaf imkanlarının onların yaşadıqları ərazilərə çatdırılmasına mühüm töhfə verir. Tədbirin rəsmi hissəsi gənclərin ifasında vətənpərvərlik ruhunda musiqili çıxışlarla başa çatıb.
Daha sonra xüsusi hazırlanmış açıq hava məkanında dövlət qurumları və özəl sektor nümayəndələri ilə görüşlər keçirilib. Gənclər üçün vətənpərvərlik, təhsil və karyera, rəqəmsal bacarıqlar, sağlam həyat tərzi və yaradıcılıq istiqamətlərində müxtəlif maarifləndirici sessiyalar təşkil olunub.
Layihənin əsas yeniliklərindən biri müxtəlif istiqamətləri əhatə edən tematik zonaların yaradılması olub. Gənclər “Vətənpərvərlik”, “Təhsil və karyera”, “Rəqəmsal düşüncə”, “Fiziki aktivlik və sağlamlıq”, “Yaradıcı gənclik” və “Əyləncə” zonalarında keçirilən vörkşoplar, master-klasslar, viktorinalar və intellektual oyunlarda fəal iştirak ediblər. Tədbir çərçivəsində fəallığı ilə seçilən gənclər mükafatlandırılıb.
“Səyyar Gənclər Xidməti” layihəsi Şəki şəhərində iyunun 27-dək davam edəcək.
Qeyd edək ki, Azərbaycan Respublikasının Gənclər Fondunun dəstəyi, Gənclərin İnkişaf və Karyera Mərkəzi və “Gənc Könüllülər” İctimai Birliyinin birgə təşkilatçılığı ilə həyata keçirilən layihə bu il Şəki, Oğuz, Qəbələ, İsmayıllı, Ağsu, Şamaxı, Qobustan, Xızı, Lənkəran, Astara, Lerik, Yardımlı, Salyan, Kürdəmir, Ucar, Zərdab, Ağcabədi, Laçın, Zəngilan və Füzuli rayonlarından olan 8 mindən çox gənci əhatə edəcək.
