“Süni intellekt dövrümüzün ən sivil, ən mütərəqqi nailiyyətidir. Öz təhlilimə əsasən deyə bilərəm ki, bu sahə çox böyük sahədir. Operativdir, istənilən bir məlumat haqqında təlimat almaq və yaxud hər hansı bir sahədə maariflənmək istədikdə çox sürətli şəkildə mövzuya aydınlıq gətirir”.
Bu sözləri “Tehsil365”ə açıqlamasında ilahiyyatçı Hacı Təyyar Hüseynli bildirib.
İlahiyyatçı bildirib ki, süni intellekt dini mövzularda faydalı ola bilər.
“Süni intellekt dini mövzularda daha çox faydalı ola bilər. Çünki dini mövzuda hər hansı bir sual yarananda insan bir neçə istiqamətə müraciət edib sualı cavablandırmaq istəsə də, fərqli-fərqli cavablar ala və bu onu çaşdıra bilər”.
Onun sözlərinə görə, dini mövzularda, ümumiyyətlə, bütün mövzularda öyrənmək və bilmək insanın inkişafıdır.
“Dini mövzularda, ümumiyyətlə, bütün mövzularda öyrənmək, bilmək, davamlı şəkildə hər gün bir yeniliyin olması və insanın da bu yeniliklərdən xəbərdar olması insanın inkişafıdır.
İlahiyyatçı vurğulayıb ki, İslam Peyğəmbərimizdən olan bir hədis var və bu çox düşündürücü bir hədisdir.
“İslam Peyğəmbərimizdən olan bir hədis var və bu, elm-maarif sahəsində çox düşündürücü bir hədisdir. Hədisdə deyilir ki, insanın bir günü dünəni ilə eynidirsə, o ziyandadır. Quranda olan ayədə isə deyilir ki, insan ziyanlıqlara düşə bilər, insan ziyanlığın içindədir. Bu da ondan irəli gəlir ki, insan nəyisə öyrənməsə, bilməsə, öyrənməyə cəhd etməsə və xüsusilə də lazım olan anda lazım olan ünvandan doğru bir istiqamətdə nəyisə bilmək istəməsə, buna səhlənkarlıq etsə, o ziyanda olar. Dini mövzuya aid suallarla süni intellektə müraciət etdim və gördüm ki, orada çox böyük bir intellekt bazası var”.