“Ev seçərkən mənim üçün ən vacib meyarlardan biri universitetə yaxınlıq idi, çünki hər gün dərslərə gedib-gəlirəm və yolun yaxın olması vaxtıma xeyli qənaət edir. Tələbə olduğum üçün büdcəmi nəzərə almalı oluram və buna görə də kirayə haqqı, kommunal xərclər, yemək, nəqliyyat və internet kimi bütün ehtiyacları qarşılamaq üçün aylıq 900–1200 manat civarında bir büdcəyə ehtiyac duyulur.“
Bu fikirləri Azərbaycan Turizm və Menecment Universiteti l kurs tələbəsi İsgəndərov Səbuhi “Tehsil365”ə verdiyi müsahibədə bildirib
– Ərazi seçərkən əsasən hansı meyarları əsas götürürsünüz?
– “Ərazi seçərkən əsas diqqət etdiyim məsələ universitetə yaxın olması idi. Çünki hər gün dərsə gedib-gəlirəm və yolun yaxın olması vaxta qənaət edir. Eyni zamanda qiymət də mənim üçün vacibdir. Tələbə olduğum üçün büdcəmə uyğun ev axtarırdım. Şəraitə də baxıram; evin təmiz, təhlükəsiz və yaşamaq üçün normal vəziyyətdə olması mənim üçün önəmlidir. Hazırda qaldığım ev bu baxımdan mənə uyğundur.”
– Bir tələbə üçün aylıq orta büdcə nə qədər olmalıdır?
– “Məncə, Bakıda kirayədə qalan bir tələbənin rahat dolanması üçün aylıq təxminən 900–1200 manat büdcəsi olmalıdır. Bunun içində kirayə, kommunal xərclər, yemək, nəqliyyat, internet və digər gündəlik ehtiyaclar var. Mən özüm kirayəyə aylıq 500 manat ödəyirəm, kommunal xərclər isə bunun üzərinə əlavə olunur. Bu səbəbdən aylıq xərclər kifayət qədər yüksək olur.”
– Kirayə ev tapmaq prosesi sizin üçün çətin oldumu?
– “Bəli, müəyyən qədər çətin oldu. Əvvəlcə həm qiyməti münasib, həm də universitetə yaxın ev tapmaq asan deyildi. Bəzi evlərin qiyməti yüksək idi, bəzilərinin isə şəraiti ürəkaçan deyildi. Bir neçə varianta baxdıqdan sonra büdcəmə və ehtiyaclarıma uyğun ev tapa bildim.”
– Kirayə ev axtararkən ən böyük çətinliyiniz nə olub?
–“ Ən böyük çətinliyim münasib qiymətdə, universitetə yaxın və yaxşı şəraiti olan ev tapmaq idi. Çox vaxt bu üç şərti eyni anda ödəyən ev tapmaq çətin olur. Bundan əlavə, kirayə qiymətləri yüksək olduğu üçün seçim etmək də asan olmur.”
Müsahibimiz İsgəndərov Səbuhinin də qeyd etdiyi kimi, tələbələrin ev axtarışı zamanı üzləşdiyi bu problemlər kirayə bazarında tənzimləyici mexanizmlərin və tələbə yönümlü yaşayış sahələrinin artırılması zərurətini bir daha gündəmə gətirir.