Naxçıvan Dövlət Universitetinin Tarix-filologiya fakültəsinin akademik heyəti və tələbələri Xaraba Gilan arxeoloji abidəsində aparılan qazıntı işlərində iştirak ediblər.
“Tehsil365” xəbər verir ki, səfər tələbələrin nəzəri biliklərinin praktik mühitdə möhkəmləndirilməsi, arxeoloji tədqiqat prosesinin yerində öyrənilməsi və onların elmi araşdırmalara cəlb olunması məqsədi daşıyıb.
Səfər çərçivəsində tələbələr qazıntı sahəsində aparılan işlərlə yaxından tanış olub, arxeoloji prosesin mərhələlərini müşahidə edərək sahə tədqiqatı üzrə praktiki biliklər əldə ediblər.
Xaraba Gilan arxeoloji ekspedisiyasının rəhbəri, tarix üzrə fəlsəfə doktoru, dosent Bəhlul İbrahimli qazıntılar, əldə olunan elmi nəticələr və abidənin tarixi əhəmiyyəti barədə məlumat verib.
Naxçıvan Dövlət Universitetinin Tarix-filologiya fakültəsinin dekanı, filologiya üzrə fəlsəfə doktoru Arif Ağalarov isə tələbələrin bu cür ekspedisiyalarda iştirakının onların peşə hazırlığının gücləndirilməsində və elmi dünyagörüşünün formalaşmasında mühüm rol oynadığını bildirib.
Qeyd edək ki, Xaraba Gilan Cənubi Qafqazın zəngin tarixi-mədəni irsə malik mühüm arxeoloji abidələrindən biri hesab olunur. Burada aparılan tədqiqatlar regionun qədim tarixinin öyrənilməsi baxımından xüsusi əhəmiyyət daşıyır.