Naxçıvan Dövlət Universitetinin (NDU) Tibb fakültəsinin 221 tələbə və həkim-rezidenti Türkiyənin nüfuzlu ali təhsil müəssisələrində yay təcrübəsi keçəcək.
“Tehsil365" xəbər verir ki, 2025/2026-cı tədris ili çərçivəsində NDU ilə Türkiyənin İstanbul-Cərrahpaşa, Ankara, Qazi, Dokuz Eylül, Akdeniz və Qaradəniz Texniki universitetləri arasında qüvvədə olan əməkdaşlıq müqavilələrinə uyğun olaraq tələbələr 6–17 iyul 2026-cı il tarixlərində yay təcrübəsinə cəlb olunacaqlar.
Bildirilib ki, proqram çərçivəsində təcrübə prosesinin səmərəli təşkili, tələbələrin nəzəri biliklərinin praktik bacarıqlarla möhkəmləndirilməsi, davamiyyət və intizam qaydalarına nəzarətin təmin olunması məqsədilə universitet üzrə rəhbər-kuratorlar təyin edilib.
Yay təcrübəsində Tibb, Stomatologiya, Əczaçılıq, Psixologiya, İctimai səhiyyə və Hərbi tibb ixtisaslarında təhsil alan 221 tələbə və həkim-rezident iştirak edəcək.
Qeyd olunub ki, proqram tələbələrin müasir tibbi təcrübə ilə yaxından tanış olmasına, peşəkar bilik və bacarıqlarının inkişafına, həmçinin Azərbaycan–Türkiyə ali təhsil əməkdaşlığının daha da möhkəmləndirilməsinə xidmət edir.
Bundan əlavə, NDU-nun Tibb fakültəsinin 21 professor-müəllim heyəti üzvü də həmin ali təhsil müəssisələrində təşkil olunan ixtisasartırma proqramında iştirak edəcək.
Proqramın əsas məqsədi professor-müəllim heyətinin peşəkar bacarıqlarının təkmilləşdirilməsi, müasir tədris və klinik təcrübənin öyrənilməsi, elmi əməkdaşlığın genişləndirilməsi və qabaqcıl beynəlxalq təcrübənin universitetdə tətbiqinə töhfə verməkdir.
