Azərbaycan Respublikasının Prezidenti yanında Dövlət İdarəçilik Akademiyasının Dövlət idarəçiliyinin hüquqi təminatı kafedrasının müdiri hüquq elmləri doktoru, professor Mehdi Abdullayevin “5 Təməl sütun: təsəvvürdə və reallıqda” kitabı nəşr edilib.
“Tehsil365” xəbər verir ki, müəllifin geniş oxucu auditoriyası üçün nəzərdə tutduğu bu əsər hüquq, politologiya və fəlsəfənin kəsişmə nöqtəsində yer alan, cəmiyyət və dövlətdə birgəyaşayışın əsas prinsiplərini təşkil edən azadlıq, demokratiya, ədalət, insan hüquqları və hakimiyyət anlayışlarının elmi təhlilinə həsr olunub.
Professor Mehdi Abdullayev kitabda qeyd olunan anlayışların mahiyyətinin düzgün dərk edilməsinin və onların yalnız məsuliyyətli şəkildə tətbiqinin insanın və dövlətin qarşılıqlı inkişafına xidmət etdiyini vurğulayır. Müəllif həmin anlayışlar haqqında formalaşmış yanlış təsəvvürləri təhlil edərək, onların əsl mahiyyətini ön plana çıxarır və siyasi manipulyasiya vasitəsinə çevrilməsinin yolverilməz olduğunu əsaslandırır.
Əsərdə Ümummilli Lider Heydər Əliyevin və Azərbaycan Prezidenti İlham Əliyevin qeyd olunan anlayışlara verdiyi dəyər, həmin anlayışların dövlətçilik prinsipləri əsasında məsuliyyətli şəkildə tətbiqinin Azərbaycanın inkişafına, suverenliyinin tam bərpasına və regionun aparıcı dövlətlərindən birinə çevrilməsinə verdiyi töhfələr xüsusi olaraq vurğulanır.
Kitabda təqdim olunan tarixi və praktiki nümunələr mövzunun daha dərindən mənimsənilməsinə imkan yaradır, oxu materialını zənginləşdirir və müəllifin irəli sürdüyü tezislərin əyani şəkildə əsaslandırılmasına xidmət edir.