Mediada dini mövzuların düzgün və obyektiv təqdim olunması cəmiyyətdə qarşılıqlı hörmətin və sabitliyin qorunmasında mühüm rol oynayır. Bu istiqamətdə media nümayəndələri və dini qurumlar arasında əməkdaşlığın əhəmiyyəti vurğulanır.
“Tehsil365” Report-a istinadən xəbər verir ki, Dini Qurumlarla İş üzrə Dövlət Komitəsinin sədr müavini Gündüz İsmayılov Qusarda Azərbaycan milli mətbuatının 151 illiyinə həsr olunmuş “Dini mövzuların mediada təqdimatı: dini sabitliyin qorunmasında birgə məsuliyyət” mövzusunda keçirilən tədbirdə çıxış edib.
O bildirib ki, bu gün din mövzusu, xüsusilə rəqəmsal mühitdə ən aktual və eyni zamanda həssas məsələlərdən biridir. Onun sözlərinə görə, dini sabitliyin qorunması üçün media ilə dini qurumlar, dini icmalar və din xadimləri arasında sıx əməkdaşlıq vacibdir.
Gündüz İsmayılov qeyd edib ki, tədbirdə yalnız müsəlman deyil, sinaqoq və kilsələrdə fəaliyyət göstərən din xadimləri də iştirak edirlər.
O vurğulayıb ki, Azərbaycanın şimal bölgəsi tolerantlıq və multikulturalizm baxımından nümunəvi bölgələrdən biridir. Burada müxtəlif dini icmaların nümayəndələri birgə yaşayır və fəaliyyət göstərirlər.
Tədbirin əsas məqsədinin dini məsələlərin mediada və rəqəmsal platformalarda hansı formada təqdim olunmasının, obyektivlik və məsuliyyət prinsiplərinin müzakirəsi olduğu bildirilib.