“Müşahidələr göstərir ki, insanlar uğursuzluğu şəxsi dəyərsizliyin sübutu kimi deyil, inkişaf prosesinin bir hissəsi kimi qəbul etdikdə psixoloji dayanıqlıqları artır və yenidən fəaliyyətə başlama ehtimalları yüksəlir" bu sözləri Xəzər Universitetinin Psixologiya Departamentinin əməkdaşı, psixoloq Mirsadiq Muxtarov “Tehsil365”ə verdiyi açıqlamada qeyd edib.
“İlk öncə qeyd etmək lazımdır ki, uğursuzluq anlayışı həyatın təbii və qaçınılmaz hissəsidir. Psixologiyada uğursuzluq təkcə nəticə kimi deyil, həm də insanın özünü, bacarıqlarını və imkanlarını yenidən qiymətləndirməsinə şərait yaradan bir təcrübə kimi dəyərləndirilir. Buna görə də uğursuzluqdan sonra yenidən motivasiya toplamaq tamamilə mümkündür. Bunun üçün əsas şərt hadisəyə necə məna verməyimiz və onu necə şərh etməyimizdir. Müşahidələr göstərir ki, insanlar uğursuzluğu şəxsi dəyərsizliyin sübutu kimi deyil, inkişaf prosesinin bir hissəsi kimi qəbul etdikdə psixoloji dayanıqlılıqları artır və yenidən fəaliyyətə başlama ehtimalları yüksəlir. Uğursuzluğu dəyişdirilə bilən amillərlə əlaqələndirib, ondan nəticə çıxarmağa çalışdıqda motivasiyanı bərpa etmək daha asan olur. Motivasiyanın azalması da, uğursuzluqdan sonra normal psixoloji reaksiyadır. Belə vəziyyətdə özünü nəyəsə məcbur etmək əvəzinə, emosiyaları qəbul etmək, müəyyən müddət özünə vaxt vermək və daha sonra real məqsədlərlə yenidən fəaliyyətə başlamaq daha uyğun yanaşmadır. Biz unutmamalıyıq ki, kiçik uğurlar insanın özünə inamını tədricən bərpa edir və daxili motivasiyanı gücləndirə bilir. Önəmli amillərdən biri sosial dəstəkdir. Ailə üzvlərinin, dostların və ya həmkarların dəstəyi insanın uğursuzluğu daha sağlam şəkildə emal etməsinə kömək edir. Eyni zamanda, özünü başqaları ilə müqayisə etmək əvəzinə, fərdi inkişafına fokuslanmaq psixoloji rifah baxımından daha faydalıdır. Qeyd etmək lazımdır ki, motivasiya həm də davranış nəticəsində formalaşan bir prosesdir. İnsan çox vaxt motivasiya olunduğu üçün hərəkət etmir, əksinə, hərəkət etdikcə motivasiyası artır. Buna görə də ilk addımı atmaq, nə qədər kiçik olsa belə, motivasiyanın yenidən formalaşmasında mühüm rol oynayır. Bir nüansı da unutmaq olmaz ki, əgər uğursuzluq uzun müddət davam edən ümidsizlik, özünə inamın ciddi azalması, gündəlik fəaliyyətə marağın itməsi və ya depressiv əlamətlərlə müşayiət olunursa, bu zaman psixoloq dəstəyi almaq faydalı ola bilər. Vaxtında göstərilən psixoloji dəstək insanın mənfi düşüncə dövrlərini qırmasına və yeni hədəflərə daha sağlam şəkildə yönəlməsinə kömək edir. Dediklərimizi ümumiləşdirsək, uğursuzluq hansısa məqsədə qarşı son deyil, inkişaf yolunda vacib təcrübədir. Əsas məsələ uğursuzluğun insanı müəyyən etməsinə imkan verməmək, ondan nəticə çıxarmaq və əldə olunan təcrübəni gələcək uğurlar üçün resursa çevirməkdir. Psixoloji baxımdan dayanıqlı insanlar elə məhz uğursuzluğu inkişafa aparan mərhələ kimi qiymətləndirə bilən insanlardır.“
Psixoloq vurğulayıb ki, uğursuzluğu dəyişdirilə bilən amillərlə əlaqələndirmək vacibdir: "İnsan uğursuzluğu dəyişdirilə bilən amillərlə əlaqələndirib, ondan nəticə çıxarmağa çalışdıqda motivasiyanı bərpa etmək daha asan olur. Motivasiyanın azalması, əslində, uğursuzluqdan sonrakı normal psixoloji reaksiyadır".
Sonda Mirsadiq Muxtarov əlavə edib ki, əsas məsələ insanın özünü başqaları ilə müqayisə etməsi deyil, fərdi inkişafa, əksi fokuslanmasıdır: "Fərdi inkişafa fokuslanaraq və bundan faydalanaraq qərarlar qəbul etmək, uğursuzluq düşüncəsini geridə qoymağa kömək edir".