Universitetlərdə psixoloji sağlamlıq tədris və universitet siyasətinin ayrılmaz hissəsi olmalıdır. Bu barədə Xəzər Universitetinin Psixologiya Departamentinin əməkdaşı, psixoloq Mirsadiq Muxtarov “Tehsil365”ə açıqlamasında bildirib.
“Əgər universitet tələbələrinin psixoloji sağlamlığını yaxşılaşdırmaq üçün yalnız bir dəyişiklik etmək imkanım olsaydı, bu, ali təhsil müəssisələrində psixoloji sağlamlığın tədris və universitet siyasətinin ayrılmaz hissəsinə çevrilməsi olardı. Ona görə ki, psixoloji sağlamlığın qorunması yalnız problem yarandıqda müraciət edilən bir xidmət kimi deyil, gündəlik həyatın və təhsil prosesinin vacib komponenti kimi qəbul edilməlidir. Aydın məsələdir ki, tələbəlik dövrü gənclərin həyatında mühüm keçid mərhələsidir. Bu dövrdə onlar yeni sosial mühitə uyğunlaşır, akademik çətinliklərlə üzləşir, peşə seçimi, gələcək karyera və şəxsi inkişafla bağlı mühüm qərarlar qəbul edirlər. Bütün bunlar onlarda müəyyən qədər psixoloji çətinliklər yarada bilir. Əgər universitet mühiti psixoloji sağlamlığı dəstəkləyən yanaşma üzərində qurularsa, tələbələr bu çətinliklərlə daha sağlam mübarizə apara bilərlər.”
“Qeyd etdiyimiz yanaşma yalnız psixoloji xidmətlərin mövcudluğu ilə məhdudlaşmamalıdır. Universitetlərdə psixoloji maarifləndirmə proqramlarının təşkil edilməsi, stressin idarə olunması, emosional tənzimləmə, vaxtın idarə edilməsi, effektiv ünsiyyət və psixoloji dayanıqlılıq kimi bacarıqların inkişafına yönəlmiş təlimlər mütəmadi keçirilməlidir. Bütün bunlar yalnız ali təhsil müəssisələrində keçirilməməli, həmçinin məktəblər, kolleclər, peşə təhsili müəssisələri və digər təhsil ocaqlarında da tətbiq olunmalıdır. Bundan əlavə, tələbələrin psixoloji dəstəyə müraciət etməsini çətinləşdirən stereotiplərin aradan qaldırılması və yardım istəməyin təbii və normal davranış kimi qəbul edilməsi vacibdir.”
“Digər önəmli məqam universitetdə dəstəkləyici psixososial mühitin formalaşdırılmasıdır. Müəllim-tələbə münasibətlərində qarşılıqlı hörmət, empatiya və açıq ünsiyyətin təşviq edilməsi, tələbələrin fikirlərini rahat ifadə edə bildikləri təhlükəsiz mühitin yaradılması önəmlidir. İnsan özünü dinlənilən və dəstəklənən düşündükdə həm akademik motivasiyası, həm də emosional dayanıqlılığı güclənir. Unutmaq olmaz ki, təhsil müəssələrində psixoloji sağlamlığın qorunması eyni zamanda sağlam həyat tərzinin təşviqini də əhatə etməlidir, çünki psixoloji rifah yalnız emosional vəziyyətdən deyil, həyat tərzindən də birbaşa əlaqəlidir.”