Misir arxeoloji missiyası Saqqara bölgəsindəki Bubasteion nekropolunda Yeni Krallıq dövrünə aid (eramızdan əvvəl 1550-1070-ci illər) türbələr aşkar edib. Onların əhatəsində olduqları qayaların üzərində heroqliflər və rəsmlər oyulub.
“Tehsil365” “Əl Əhram” qəzetinə istinadla xəbər verir ki, türbələr ərazinin əhəngdaşı yamacının şərq tərəfində aşkar edilib. Tapıntıda, həmçinin Yeni Krallıq dövründə yaşamış məmurlar, hərbi liderlər və varlı ailələr haqqında yeni dəlillər təqdim edən heroqlif yazılar və memarlıq xüsusiyyətləri də var. Bu kəşf qədim Memfit nekropolunun tarixinə yeni biliklər əlavə edir.
Arxeoloqların sözlərinə görə, kəşfin əhəmiyyəti təkcə əvvəllər məlum olmayan məzarların qazılmasında deyil, həm də orada dəfn olunmuş şəxslərin həyatı barədə yeni məlumatların əldə edilməsidir. Belə ki, qayaüstü yazılar və rəsmlər Yeni Krallıq dövründə Misir cəmiyyətinin öyrənilməsini zənginləşdirən dəyərli biliklər verir.
Bu kəşf Bubasteion nekropolunda davam edən arxeoloji tədqiqatın bir hissəsidir. Qazıntıların araşdırılmamış dəfn şaxtalarında və ətraf ərazilərdə davam etdirilməsi gözlənilir; burada arxeoloqlar nekropolun tarixini daha geniş işıqlandıracaq əlavə məzarların və arxeoloji dəlillərin aşkarlanacağını gözləyirlər.
Saqqara arxeoloji missiyasının rəhbəri Əmr Əl-Tayeb bildirib ki, ilk məzar Mentuhotep adlı bir məmura məxsusdur. Türbənin şimal divarında qurban gətirənlərin və ovçuların incəliklə işlənmiş səhnələri, həmçinin məzar sahibinin anası Eihotep ilə birlikdə oturmuş böyük təsviri ailənin yüksək sosial mövqeyini əks etdirir. Heroqlif yazıları Mentuhotepin bir sıra nüfuzlu titullarını da qeyd edir.
Türbədə, həmçinin hələ tam qazılmamış dəfn şaxtası var. Arxeoloqlar Mentuhotepin ailəsi və karyerası ilə bağlı əlavə dəlillər aşkar etmək ümidi ilə növbəti qazıntı mövsümündə işləri bərpa etməyi planlaşdırırlar.
İkinci və üçüncü türbələr də Kral ailəsində yüksək mövqeyə malik olan şəxslərə aiddir. Qayaların üzərində onların ailə üzvlərinin rəsmləri də yer alıb. Arxeoloqlar iddia edirlər ki, ən vacib kəşflər arasında Suriyanın şimalındakı Nəharin torpağından hərbi komandirin qayıtmasına aid heroqlif yazısı olan sütunun bir hissəsi də var.
