Məktəbəqədər təhsil sahəsində tətbiq ediləcək yeni maliyyələşmə modelinin uşaqların təhsilə çıxış imkanlarını artıracağı və özəl bağçaların inkişafına şərait yaradacağı bildirilib.
“Tehsil365” xəbər verir ki, Məktəbəqədər və Ümumi Təhsil üzrə Dövlət Agentliyinin direktor müavini Vəfa Yaqublu məktəbəqədər təhsil sahəsində valideyn-özəl-dövlət əməkdaşlığına əsaslanan maliyyələşmə modelinin tətbiqinin nəticələrindən danışıb.
“Azərbaycan müəllimi” xəbər verir ki, V.Yaqublu bildirib ki, yeni model dövlət məktəbəqədər təhsil müəssisələrində növbədə olan uşaqların sayını azaldacaq və daha çox uşağın məktəbəqədər təhsilə çıxışını təmin edəcək.
Direktor müavini qeyd edib ki, bu, eyni zamanda özəl qurumların inkişafına və potensiallarının tam şəkildə üzə çıxarılmasına imkan verəcək.
“Bu həm də yeni iş yerlərinin açılması deməkdir. Çünki tam gücü ilə işləyən məktəbəqədər təhsil müəssisələrinə yeni tərbiyəçi müəllimlər də lazım olacaq ki, onların da işlə təmin olunması məsələsi aktuallaşacaq”, – deyə V.Yaqublu bildirib.
Onun sözlərinə görə, yeni maliyyələşmə modeli dövlət və özəl məktəbəqədər təhsil müəssisələri arasında rəqabətliliyi artıracaq.
Direktor müavini bildirib ki, əvvəlcə dövlət lisenziyası olan məktəbəqədər təhsil müəssisələri müsabiqəyə müraciət edə bilərlər. Müsabiqə Elm və Təhsil Nazirliyi tərəfindən keçiriləcək və müəssisələr tələb olunan sənədləri təqdim etməli, məktəbəqədər təhsillə məşğul olmaq potensiallarını sübut etməlidirlər.
V.Yaqublu qeyd edib ki, müsabiqə komissiyası ən azı 5 nəfərdən ibarət olacaq. Sənədlər təhlil edildikdən sonra qaliblərin siyahısı nazirliyin rəsmi saytında elan ediləcək.
Bundan sonra valideynlər qalib özəl müəssisələr arasından uyğun olanı seçərək müraciət edə biləcəklər. Valideynlər övladlarını Elektron hökumət informasiya sistemində (EHİS) qeydiyyatdan keçirəcək, şəxsi kabinet yaradacaq və seçdikləri müəssisə ilə təklif olunan şərtlər əsasında müqavilə bağlayacaqlar.
Bildirilib ki, maliyyələşmə 10 ay müddətinə həyata keçiriləcək və növbəti 10 ay üçün yenidən müraciət etmək imkanı olacaq.