Akademik mədəniyyət elmi inkişafın davamlılığını təmin edən əsas amillərdən biridir. Elmi dürüstlük, obyektivlik, tənqidi düşüncə, fikir plüralizmi və etik məsuliyyət kimi prinsiplər elmi fəaliyyətin etibarlılığının əsasını təşkil edir.
“Tehsil365” Azertaca istinadən xəbər verir ki, Gənclər Akademiyasının sədri, kimya üzrə fəlsəfə doktoru, dosent Elmir Babayev söyləyib. O qeyd edib ki, elmin inkişafı yalnız laboratoriyalar, texnologiyalar və maliyyə imkanları ilə məhdudlaşmır. Elmi institutların gücü həm də akademik mədəniyyətin formalaşması, elmi dəyərlərin qorunması və yeni nəsil tədqiqatçılara ötürülməsi ilə müəyyən olunur.
“Akademik mədəniyyət elmin görünməyən infrastrukturu kimi çıxış edir. Elmi dürüstlük, açıq müzakirə mühiti, mentorluq ənənəsi və elmi məktəblərin davamlılığı məhz bu mədəniyyət vasitəsilə formalaşır”, – deyə Gənclər Akademiyasının sədri bildirib. AMEA-nın Azərbaycan elminin inkişafındakı roluna toxunan müsahibimiz vurğulayıb ki, 1945-ci ildən fəaliyyət göstərən bu qurum ölkədə fundamental elmin inkişafına, müxtəlif elmi məktəblərin yaranmasına və yüksəkixtisaslı alimlərin yetişdirilməsinə töhfələr verib.
E.Babayev bildirib ki, müasir dövrdə elmlər akademiyaları yalnız elmi tədqiqatların aparıldığı müəssisələr deyil, eyni zamanda, dövlət siyasətinin elmi əsaslarla formalaşdırılmasına, strateji qərarların hazırlanmasına və qlobal çağırışların həllinə töhfə verən intellektual mərkəzlərdir.
AMEA Gənclər Akademiyasının sədri elm diplomatiyasının müasir beynəlxalq münasibətlərdə əhəmiyyətinin artdığını da qeyd edib. Onun sözlərinə görə, elm dövlətlər arasında əməkdaşlıq, qarşılıqlı anlaşma və etimad mühitinin gücləndirilməsi üçün mühüm vasitədir.
İqlim dəyişiklikləri, enerji təhlükəsizliyi, süni intellekt, biotəhlükəsizlik və digər qlobal çağırışlar beynəlxalq elmi əməkdaşlığın əhəmiyyətini daha da artırır.
“Azərbaycan üçün elm diplomatiyası ölkənin elmi potensialının beynəlxalq elmi məkanda tanıdılması, akademik əlaqələrin genişləndirilməsi və milli maraqların elmi platformalar vasitəsilə təşviqi baxımından strateji əhəmiyyət daşıyır”, – deyə Elmir Babayev vurğulayıb. AMEA Azərbaycanın elmi yaddaşını, intellektual potensialını və beynəlxalq elmi əlaqələrini formalaşdıran mühüm institutlardan biridir. Akademik mədəniyyətin inkişafı və elm diplomatiyasının gücləndirilməsi isə gələcək elmi nailiyyətlərin əsas şərtlərindəndir.