İnformasiya texnologiyaları sahəsində beynəlxalq əməkdaşlıqların genişləndirilməsi Azərbaycan Kibertəhlükəsizlik Mərkəzinin (AKM) inkişafında mühüm mərhələ təşkil edir. Bu əməkdaşlıqlar həm yerli mütəxəssislərin beynəlxalq sertifikatlara çıxışını genişləndirir, həm də ölkədə kibertəhlükəsizlik və süni intellekt istiqamətlərində peşəkar kadr potensialının daha da gücləndirilməsinə xidmət edir.
“Tehsil365” xəbər verir ki, bu fikirləri İnnovasiya və Rəqəmsal İnkişaf Agentliyinin (İRİA) İdarə Heyətinin sədri Fərid Osmanov Azərbaycan Kibertəhlükəsizlik Mərkəzinin 7-ci məzun günü münasibətilə keçirilən tədbirdəki çıxışı zamanı səsləndirib.
O bildirib ki, informasiya texnologiyaları sahəsində beynəlxalq sertifikatlaşdırma təşkilatı “CompTIA” ilə əməkdaşlıq nəticəsində Azərbaycan Kibertəhlükəsizlik Mərkəzi akkreditasiya mərkəzi statusu qazanıb. Bunun sayəsində 250-dən çox məzunun beynəlxalq sertifikatlaşdırılmasına dəstək göstərilib, onlardan 230-dan çoxu isə sertifikatlaşdırma prosesini uğurla başa vurub.
Fərid Osmanov qeyd edib ki, tərəfdaşlıq artıq yeni mərhələyə qədəm qoyub və “CompTIA” ilə süni intellekt sistemlərinin kibertəhlükəsizliyi sahəsində əməkdaşlığa başlanılıb. Bu əməkdaşlıq çərçivəsində AKM məzunlarının süni intellekt təhlükəsizliyi istiqamətində bilik və bacarıqlarının inkişaf etdirilməsi, həmçinin beynəlxalq sertifikasiya imkanlarına çıxışlarının genişləndirilməsi nəzərdə tutulur.
İdarə Heyətinin sədri vurğulayıb ki, proqram təminatının təhlükəsizliyi üzrə ixtisaslaşmış beynəlxalq kibertəhlükəsizlik şirkəti “Snyk” ilə əməkdaşlıq çərçivəsində proqram təminatının təhlükəsizliyi sahəsində peşəkar icmanın formalaşdırılmasına başlanılıb. Onun sözlərinə görə, bu təşəbbüs təhlükəsiz proqram təminatı hazırlanması üzrə müasir yanaşmaların ölkədə tətbiqinə və mütəxəssislər arasında bilik mübadiləsinin genişlənməsinə töhfə verəcək.
Fərid Osmanov diqqətə çatdırıb ki, “CyberPark” vasitəsilə süni intellekt sahəsində dünyanın aparıcı şirkətlərindən biri olan “Anthropic” ilə də əməkdaşlıq qurulub. Bu tərəfdaşlıq qabaqcıl süni intellekt texnologiyalarının kibertəhlükəsizlik ekosisteminə inteqrasiyasına, eləcə də süni intellektəsaslı innovativ proqramların hazırlanmasına yeni imkanlar yaradacaq.
O, həmçinin bildirib ki, Azərbaycan Kibertəhlükəsizlik Mərkəzi Avropanın nüfuzlu beynəlxalq kibertəhlükəsizlik yarışı olan European Cyber Cup (EC2) ilə əməkdaşlığa başlayıb. Bu əməkdaşlıq Azərbaycan komandalarının Avropa səviyyəli yarışlarda iştirakını genişləndirəcək, yerli istedadların beynəlxalq platformalarda tanınmasına və ölkəmizin kibertəhlükəsizlik sahəsində mövqeyinin daha da möhkəmlənməsinə xidmət edəcək.
Fərid Osmanov bu ildən etibarən yeni təşəbbüsün həyata keçiriləcəyini də açıqlayıb: “İlk dəfə olaraq proqramı ən yüksək nəticə ilə başa vuran beş məzun xaricdə fəaliyyət göstərən qabaqcıl şirkətlərdə bir aylıq təcrübə proqramına göndəriləcək. Bu təşəbbüs onların beynəlxalq iş mühitində təcrübə qazanmasına, qabaqcıl texnologiyalar və yanaşmalarla yaxından tanış olmasına, əldə etdikləri bilik və bacarıqları Azərbaycanda tətbiq etməsinə imkan yaradacaq. Həmçinin bu təşəbbüs gələcəkdə ölkəyə yeni layihələrin, innovativ həllərin və peşəkar biliklərin gətirilməsinə mühüm töhfə verəcək”.