"Azərbaycanda Türkiyə ilə birgə iki peşə təhsili müəssisəsi yaradılacaq".
“Tehsil365” xəbər verir ki, bunu Peşə Təhsili üzrə Dövlət Agentliyinin direktoru İlqar Bayramlı jurnalistlərin sualını cavablandırarkən deyib.
Onun sözlərinə görə, ölkə Prezidentinin 5 dekabr 2025-ci il tarixli Sərəncamına əsasən, qarşıdakı illərdə 21 yeni peşə təhsili müəssisəsinin tikilməsi, 2 müəssisənin isə əsaslı təmir olunması nəzərdə tutulur.
Direktor bildirib ki, Sərəncamın icrası ilə bağlı Nazirlər Kabineti tərəfindən müvafiq Tədbirlər Planı təsdiqlənib. Hazırda yeni müəssisələrin hansı regionlarda yerləşəcəyi və layihəyə hansı peşə təhsili müəssisələrinin daxil ediləcəyi ilə bağlı seçim prosesi aparılır.
"Yaxın vaxtlarda bu prosesi yekunlaşdıracağıq. Müəssisələr müəyyənləşdirildikdən sonra layihələndirmə işlərinə başlanılacaq. Düşünürəm ki, 2027-ci ildən etibarən bir neçə müəssisənin tikintisinə start veriləcək. Proses 2028, 2029 və 2030-cu illərdə də davam etdiriləcək və həmin dövrdə yeni peşə təhsili müəssisələri istifadəyə veriləcək".
O xatırladıb ki, Azərbaycan və Türkiyə hökumətləri arasında 2021-ci ildə peşə təhsili sahəsində əməkdaşlığa dair protokol imzalanıb. Həmin protokola 2025-ci ildə əlavə sənəd qəbul olunub və bu sənəd həm Azərbaycan Milli Məclisi, həm də Türkiyə Böyük Millət Məclisi tərəfindən ratifikasiya edilib.
İlqar Bayramlının sözlərinə görə, əməkdaşlıq çərçivəsində Azərbaycanda Türkiyə ilə birgə iki peşə təhsili müəssisəsinin yaradılması planlaşdırılır.
"Müəssisələrdən biri Bakıda, digəri isə Qubada fəaliyyət göstərəcək. Burada 5 istiqamət üzrə ixtisasların tədrisi nəzərdə tutulur. Təhsil alan tələbələr həm Azərbaycan qanunvericiliyinə uyğun peşə diplomu, həm də Türkiyə qanunvericiliyinə uyğun peşə diplomu əldə edəcəklər. Bu isə məzunların beynəlxalq əmək bazarında daha rəqabətli kadr kimi formalaşmasına imkan yaradacaq", – deyə direktor vurğulayıb.
O əlavə edib ki, yeni yaradılacaq peşə təhsili müəssisələri üzrə təkcə tikinti işləri deyil, həmçinin yeni təhsil proqramlarının hazırlanması və beynəlxalq ikili diplom proqramlarının tətbiqi də nəzərdə tutulur.