Təhsil gənclərin inkişafında və cəmiyyətin gələcəyində həlledici rol oynayır. Bəs müasir təhsil sistemi bu gözləntiləri nə dərəcədə doğrulda bilir və gənclərin dünyagörüşünün formalaşmasında bədii ədəbiyyatın yeri nədir?
Bu barədə fikirlərini “Tehsil365”ə açıqlamasında tanınmış yazıçı Elxan Elatlı bildirib.
Onun sözlərinə görə, təhsilin gənclərimizin inkişafındakı rolu həddən artıq böyük və hətta həlledicidir. Millət və xalq olaraq bütün uğurlarımız da, uğursuzluqlarımız da birbaşa təhsilin vəziyyəti ilə bağlıdır.
“Bu baxımdan müasir təhsil sistemi gənclərin inkişafı üçün təbii ki, nələrsə edir. Lakin mən şəxsən ciddi dəyişikliklərə ehtiyac olduğunu düşünürəm. Məktəblərdə elmi bilik verən fənlərin sadələşdirilməsi və həftəlik saatların azaldılması hesabına həqiqi həyat dərsi verən, uşaqları gələcəyin əsl insanı və vətəndaşı kimi hazırlayan dərs və məşğələlərə üstünlük verilməlidir.”
Yazıçı vurğulayıb ki, orta məktəb yalnız universitetlərə hazırlıq yeri olmamalıdır:
“Tərbiyəyə və peşə hazırlığına xüsusi diqqət yetirilməlidir. Ən əsası isə dövlət müəllimin cəmiyyətdəki nüfuzunun artırılması üçün təcili tədbirlər görməlidir.”
Əsərlərindəki obrazların təhsilə münasibətindən danışan Elxan Elatlı bədii ədəbiyyatda bu mövzunun xüsusi yeri olduğunu qeyd edib:
“Romanlarımda təhsilin təbliğinə həmişə yer vermişəm və bunu özümə borc bilirəm. Məsələn, ən çox sevilən baş qəhrəmanım, polis xəfiyyəsi Qanbay Qasımlı eyni zamanda riyaziyyatı dərindən bilir. Başqa misallar da çəkmək olar.”
Yazıçı gənclərin mənəvi tərbiyəsində və dünyagörüşünün inkişafında bədii ədəbiyyatın rolunun danılmaz olduğunu diqqətə çatdırıb:
“Müşahidələrim göstərir ki, bədii ədəbiyyat oxuyan gənclər zərərli vərdişlərdən maksimum uzaq olurlar. Mədəni danışıq səviyyələri yüksek olur, insanlarla rahat ünsiyyət qura bilirlər. Yaşları az olduğu halda həyat təcrübəsinə malik olurlar. Təəssüf ki, bu gün məktəblərimizdə bədii ədəbiyyatın təbliğinə kifayət qədər diqqət yetirilmir və bunun xoşagəlməz nəticələrini görə bilirik.”
Sonda yazıçı gənclərə öz tövsiyələrini verib:
“Gənclərimizə tövsiyəm bu ola bilər ki, ilk növbədə təhsillərini artırmaqla, bədii əsərlər oxumaqla özlərini formalaşdırsınlar. Daha sonra cəsarətli və açıq fikirli olsunlar. Doğma ana dilimizə və digər mənəvi dəyərlərimizə zərər vuran ünsürlərə qarşı mübarizə aparmağı bacarsınlar.”