Misirdə Azərbaycan diasporunun sədri, tədqiqatçı-alim Seymur Nəsirovun rəhbərlik etdiyi “əl-Halqa” İrsin Dirçəldilməsi və Yerli İnkişaf Fondunda müxtəlif ixtisaslar üzrə təhsil alan 240 məzuna sertifikat təqdim olunub. Sertifikat alanlar arasında tanınmış azərbaycanlı, Quran qaresi Rza Rzayev də yer alıb.
“Tehsil365” xəbər verir ki, xəbər verir ki, tədbirin açılışında çıxış edən Seymur Nəsirov rəhbərlik etdiyi qurumların, o cümlədən Misir-Azərbaycan Dostluq Cəmiyyətinin fəaliyyəti haqqında məlumat verib.
Bildirilib ki, “əl-Halqa” Fondunda və Misir-Azərbaycan Dostluq Cəmiyyətində Qurani-Kərimin qiraəti, ərəb dili, ərəb xəttatlığı, Azərbaycan dili, ənənəvi toxuma, ornament sənəti, məqam, memarlıq və digər istiqamətlər üzrə tədris həyata keçirilir.
Daha sonra “əl-Halqa” Fondunun nəzdində fəaliyyət göstərən Memarlıq və Şəhərsalma Evinin direktoru, doktor Xalid Azəb çıxış edib. O, mədəni irsin qorunmasının milli-mədəni kimliyin yaşadılması baxımından əhəmiyyət daşıdığını vurğulayıb. Bildirib ki, fond memarlıq, incəsənət və irs sahəsində çalışan mütəxəssisləri bir araya gətirən elmi platforma kimi fəaliyyət göstərir, tarixi irsin müasir yanaşmalar əsasında qorunaraq gələcək nəsillərə ötürülməsinə xidmət edir.
Qeyd olunub ki, “əl-Halqa” Fondu hazırda müxtəlif ölkələrdən olan 1000-dən çox tələbəyə ödənişsiz təhsil və mədəni xidmətlər göstərir. Onların təxminən yarısını Misir vətəndaşları təşkil edir.