“Məktəb uşağın yalnız biliyini deyil, həm də psixoloji təhlükəsizliyini qorumalıdır. Çünki bir uşaq bir gələcək, bir ailə deməkdir”.
Bu fikirləri psixoloq Nabat Mirzəyeva “Tehsil365”ə verdiyi açıqlamada bildirib.
“Məktəblərdə bullinq dedikdə, bir şagirdin digərinə qəsdən və ya təkrarlanan şəkildə fiziki, psixoloji və sosial cəhətdən zərər verməsi nəzərdə tutulur. Burada söhbət təkcə fiziki şiddətdən, döyməkdən getmir. Lağ etmək, təhqir etmək, alçaltmağa çalışmaq, uşağı qrupdan kənarlaşdırmaq, ləqəb qoyaraq incitmək, hər kəsin içində həmin ləqəblə səsləmək, sosial şəbəkələrdə alçaltmaq da bullinqə daxildir.
Bullinqin bir neçə səbəbi var. Əsas səbəblərdən biri ailədir. Ailədə zorakılıq, laqeydlik və sevgisizlik varsa, uşağın empatiya bacarığı zəif inkişaf edir. Uşağın duyğuları və hissləri önəmsənilmədikdə aqressiv davranış modellərini təkrarlamağa başlayır. Eyni zamanda, ailədə ala bilmədiyi diqqəti, sevgini və dəstəyi ətrafında güc qazanmağa çalışaraq əldə etməyə cəhd edir.
Bundan başqa, məktəbdə nəzarətin və maarifləndirmənin kifayət qədər olmaması da bullinqin baş verməsinin əsas səbəblərindən biri hesab olunur.
Bullinq uşağın psixologiyasında dərin izlər buraxır və bu təsirlər ömür boyu davam edə bilər. Hətta illər sonra bullinqə məruz qalmış şəxslər həmin dövrü xatırlayarkən "o illərə qayıtmaq istəməzdim" deyirlər. Çünki yaşadıqları hadisələr onlarda uzunmüddətli psixoloji iz buraxır.
Bullinq uşağın özünəinamını azaldır, məktəbə getmək istəyini zəiflədir, narahatlıq və qorxularını artırır, dərs nəticələrinin aşağı düşməsinə səbəb olur. Depressiv əlamətlər yaranır, sosial münasibətlərdən uzaqlaşma və özünəqapanma müşahidə edilir.
Əgər bu vəziyyət uzun müddət davam edərsə, uşağın insanlara etibar etməsinə və gələcəkdə sağlam münasibətlər qurmasına da mənfi təsir göstərə bilər.
Mən hər zaman deyirəm ki, uşaqlara istər məktəbdə, istərsə də ailədə öyrədilməli olan ən vacib şey təkcə fənlər deyil. Biz övladlarımıza hörməti, empatiyanı, anlayışı, diqqəti, sevgini və mərhəməti aşılamağı bacarmalıyıq. Çünki bir uşağın yaddaşından dərslər unudula bilər, amma ona yaşadılan acılar və alçaldılma hissi uzun illər unudulmur.
Məktəb uşağın yalnız biliyini deyil, həm də psixoloji təhlükəsizliyini qorumalıdır. Çünki bir uşaq bir gələcək, bir ailə deməkdir”.