“Son illər müşahidə olunan, həmçinin Azərbaycana xas olan uzunmüddətli isti hava dalğaları və quraqlıq təbiətə yalnız müvəqqəti deyil, həm də uzunmüddətli yığılan təsirləri də göstərir”.
Bu sözləri “Tehsil365”ə açıqlamasında ekoloq Cəmşid Bəxtiyar bildirib.
Ekoloq bildirib ki, bu proseslər bir-birindən təsirlənərək ekosistemin dayanıqlılığını zəiflədir.
“Bu proseslər bir-birindən təsirlənərək ekosistemin dayanıqlılığını zəiflədir. Bizim ölkədə quraqlıq və səhralaşma riski orta illik temperaturun artması, yay mövsümünün uzanması, güclü istilər və buxarlanmanın artması ilə daha da güclənir”.
Onun sözlərinə görə, bu proseslərin ətraf mühitə, ekosistemə bir çox təsirləri vardır.
“Bu proseslərin ətraf mühitə, ekosistemə bir çox təsirləri vardır. Əvvəla, su ehtiyatlarının azalmasını qeyd etmək lazımdır. Çaylarda su sərfi aşağı düşür, göllər və bataqlıqlar kiçilir, yeraltı suların bərpası ləngiyir, xüsusilə Kür-Araz ovalığında su qıtlığı daha kəskin hiss olunur. İkinci bir təsir isə bitki örtüyünün zəifləməsi ilə müşahidə olunur. Torpaqda rütubət azalır və rütubət azaldıqca otlaq və çəmənliklər quruyur, meşələrdə istilik və su çatışmazlığından ağaclar stress keçirir, kütləvi ağac xəstəlikləri və qurumalar müşahidə olunur. Ümumiyyətlə, bitkilərin böyüməsilə məhsul darlığı təsirlərdən aşağı düşür”.
Ekoloq vurğulayıb ki, Avrasiya üzrə aparılan tədqiqatlar göstərir ki, quraqlıq və isti dalğaların birlikdə baş verməsi ekosistemlərə karbon toplamaq qabiliyyətini azaldır.
“Avrasiya üzrə aparılan tədqiqatlar göstərir ki, quraqlıq və isti dalğaların birlikdə baş verməsi ekosistemlərə karbon toplamaq qabiliyyətini azaldır. Başqa bir təsir torpağın deqradasiyası və səhralaşmadır. Güclü buxarlanma torpaqda duzların yığılmasını artırır, münbit qat zəifləyir, eroziya güclənir və bəzi ərazilər tədricən səhralaşma riski ilə üzləşir. Digər tərəfdən, heyvanlar aləminin də bu proseslərə təsiri vardır. Su mənbələrinin azalması, quşların, məməlilərin, sürünənlərin, həşəratların yaşayış mühitini daraldır. Bəzi növlər daha sərin ərazilərə miqrasiya eləməli olurlar, bəzilərinin isə sayı azalırsa, bəziləri yoxa çıxmaq təhlükəsi ilə üzləşirlər”.