Rəqəmsallaşma və süni intellekt dövründə müasir Azərbaycan təhsilinin milli-mənəvi dəyərlərlə texnoloji yenilikləri necə uzlaşdırmalı olduğu məsələsi günümüzün en vacib mövzularındandır.
Məsələ ilə bağlı Xalq şairi, ictimai-siyasi xadim Sabir Rüstəmxanlı “Tehsil365”-ə saytına öz xüsusi açıqlamasını verib.
Sabir Rüstəmxanlı bildirib ki, təhsil ilk növbədə millətin öz övladlarını öz ideallarına və arzularına uyğun yetişdirmək vasitəsidir:
"Təhsil deyildikdə, ilk növbədə millətin öz övladlarını təhsil vasitəsilə özünə bənzətməsi, özü kimi yetişdirməsi və öz arzularına, ideallarına uyğun formalaşdırması nəzərdə tutulur. Yəni milli təhsil birinci növbədə vətənpərvər, millətini sevən, onun dilini, tarixini, mədəniyyətini və milli dəyərlərini dərindən bilən, ayıq milli şüura malik vətəndaş yetişdirməyə xidmət etməlidir. Bütün təhsil sisteminin əsasında dayanan vacib amil məhz budur."
Xalq şairi vurğulayıb ki, texnoloji tərəqqi və müasir yeniliklər milli təhsilin mahiyyətini əvəz etməməlidir:
"Milli kimliyi və dəyərləri gənc nəslə aşılamaq təhsilin ilk və əsas işidir. Bunu heç vaxt yeni texnologiyalarla qarışdırmaq olmaz. Yeni texnologiyaların bu işin mahiyyətini dəyişmək və ya onun yerini tutmaq kimi bir imkanı olmamalıdır. Əksinə, biz süni intellektin və müasir texnologiyaların imkanlarından milli təhsilimizi daha da gücləndirmək, əl-qolunu açmaq və onu dünya informasiya sisteminə inteqrasiya etmək üçün istifadə etməliyik."
Keçmişdən bu günə əlifba və dil dəyişikliklərinə də toxunan Sabir Rüstəmxanlı, xarici dil və texnologiya öyrənərkən doğma dili unutmamağın vacibliyini qeyd edib:
"Tarix boyu da belə olub: əlifbalar dəyişəndə və ya xarici dilləri öyrənəndə bu, öz dilimizdən, milli kökümüzdən qopmaq hesabına baş verməməlidir. Texnologiyaya da bu prizmadan yanaşmalıyıq. Süni intellekt və informasiya sistemləri öz verdiyi gücü bizim milli bazamızdan, milli şüurumuzdan və mənəvi sərvətlərimizdən almalıdır. Təhsil sistemindəki bütün yeniliklər ana dilimizin öyrənilməsinə, mütaliə mədəniyyətinin formalaşmasına və kitaba olan sevginin artırılmasına xidmət etməlidir."
Sonda Sabir Rüstəmxanlı milli mənəviyyata söykənən təhsilin qlobal çağırışlara qarşı ən böyük güc olduğunu xüsusi vurğulayıb:
"Milli-mənəvi dəyərlərə və xalqın zəngin keçmişinə söykənən geniş dünyagörüşü olmadan yeni texnologiyaları da dərindən dərk etmək mümkün deyil. Milli təhsilimiz nə qədər güclü olarsa, dünyada gedən qlobal proseslərə və texnoloji yeniliklərə bir o qədər vaxtında, mütəşəkkil və adekvat cavab verə bilərik."