Hər il avqustun 6-da Beynəlxalq “Dünya həkimləri sülh uğrunda” Günü qeyd olunur.
“Tehsil365” AZERTAC-a istinadən xəbər verir ki, bununla bağlı təklif “Dünya həkimləri nüvə təhlükəsinin qarşısının alınması uğrunda” təşkilatı tərəfindən irəli sürülüb. Həmin tarix 1945-ci il avqustun 6-da Yaponiyanın Xirosima şəhərinin bombalanmasının ildönümü günündə qeyd edilib. Bu əlamətdar gün nüvə silahlarının insan sağlamlığı və bəşəriyyət üçün yaratdığı təhlükələrə diqqəti cəlb etmək məqsədi daşıyır.
Müxtəlif ölkələrdən həkimləri bir araya gətirən “Dünya həkimləri nüvə təhlükəsinin qarşısının alınması uğrunda” təşkilatı nüvə müharibəsinin tibbi nəticələrinin qarşısının alınması və nüvə silahlarının tam ləğvi istiqamətində fəaliyyət göstərir. Təşkilatın uzunmüddətli beynəlxalq fəaliyyəti 1985-ci ildə Nobel Sülh mükafatı ilə qiymətləndirilib. Qurum nüvə müharibəsinin qalibinin olmayacağını, belə bir münaqişənin səhiyyə sistemlərini iflic edəcəyini və humanitar fəlakət yaradacağını elmi əsaslarla beynəlxalq ictimaiyyətə çatdırır.
Mütəxəssislərin fikrincə, müasir dövrdə nüvə silahlarının mövcudluğu qlobal təhlükəsizlik üçün əsas çağırışlardan biri olaraq qalır. Həkimlər vurğulayırlar ki, genişmiqyaslı nüvə müharibəsinin tibbi nəticələrini heç bir ölkənin səhiyyə sistemi aradan qaldırmağa qadir deyil. Buna görə də nüvə silahlarının qarşısının alınmasının yeganə effektiv yolu onların istifadəsinin və yayılmasının tamamilə qarşısının alınmasıdır.
Bu gün dünyanın müxtəlif ölkələrində elmi konfranslar, maarifləndirici tədbirlər, sərgilər və ictimai kampaniyalar təşkil olunur. Tədbirlərdə sülhün qorunması, nüvə silahlarının ləğvi və gələcək nəsillərin təhlükəsizliyinin təmin edilməsinin vacibliyi ön plana çəkilir.
Beynəlxalq “Dünya həkimləri sülh uğrunda” Günü dünya ictimaiyyətinə bir daha xatırladır ki, insan həyatının və sağlamlığının qorunması yalnız tibbin deyil, həm də davamlı sülhün və beynəlxalq əməkdaşlığın möhkəmləndirilməsindən asılıdır.