Müasir dünyada təhsil həm də dövlətin "yumşaq gücü" və strateji təhlükəsizlik faktorudur. Bəs Azərbaycanın təhsil sistemi və insan kapitalı ölkəmizin gələcək inkişaf hədəflərini nə dərəcədə dəstəkləyir?
Məsələ ilə bağlı politoloq Telman Nüsrətoğlu “Tehsil365”*ə öz dəyərli fikirlərini bölüşüb:
"Əvvəla oradan başlamaq lazımdır ki, Azərbaycan insanı və ailəsi təhsilə çox büyük önəm verir. Hətta bəzən öz məhdud maddi imkanlarının çərçivəsini aşaraq övladını ən yaxşı məktəblərdə, universitetlərdə oxutdurmağa çalışır.
Bizim insanımız çox istedadlıdır, zəkidir və çalışqandır. Bunu açıq şəkildə görə bilirik, çünki bu gün dünyanın fərqli universitetlərində azərbaycanlı elm adamlarının, akademisiyanların necə uğurlu layihələr həyata keçirdiyini, dərs dediklərini görürük. Dolayısı ilə, insanımızın potensialı yüksəkdir.
Lakin bu potensialın aktiv bir intellektual gücə çevrilməsi və gələcək nəsillərin çağla yarışacaq bir nəsil ola bilməsi üçün təhsil sisteminin içərisində çevik mexanizmlər və islahatlar həyata keçirilməlidir. Bu gün biz sürətlə dəyişən dinamizmini itirməyən bir çağın içindəyik. Süni intellekt və yüksək texnologiyalar artıq elə bir səviyyədədir ki, demək olar ki, hər ay, hər il yeni-yeni icadlarla qarşı-qarşıya qalırıq.
Belə bir templə dəyişən informasiya çağında məktəblərimizi və universitetlərimizi buna uyğun qurmalıyıq. Xüsusilə praktiki biliklərə, təcrübəyə, fabrik və zavodlarla universitet mühitinin bərabər çalışmasına böyük ehtiyac var. Dünyada başarılı universitetlərin hamısının arxasında məhz bu model dayanır.
Digər tərəfdən, texnoparklar və AR-GE (Tədqiqat və İşlənmə) mərkəzləri qurulmalıdır. Təəssüf ki, bizdə universitetlərin mövcud vəziyyətinə baxsaq, hələ ki istənilən yaxşı səviyyədə deyilik. Ona görə də bu istiqamətdə dövlətin islahatlar aparması ilə yanaşı, universitetlərin akademik dairələrində də dəyişikliklərin həyata keçirilməsinə ehtiyac var.
Azərbaycan gəncləri Dövlət Proqramı çərçivəsində xaricdəki qabaqcıl universitetlərdə oxuyub qayıdırlar, dövlətimiz də bu gənclərin yetişməsinə kömək edir. Biz həmin gənclərin də potensialından xüsusilə istifadə etməliyik. Ölkəmizdəki bir neçə qabaqcıl universiteti daha da dəstəkləyərək, onların texniki və fiziki imkanlarını artırmalıyıq.
Təbii ki, akademik heyət və elm xadimləri yüksek maaş almalı, onlar üçün yaxşı şərait yaradılmalıdır. Bu yalnız universitetlərdə deyil, orta məktəblərdən başlayan bir prosesdir. İnşallah, yavaş-yavaş biz də bütün bu vacib islahatları vaxtında həyata keçirərək universitetlərimizi dünyanın önəmli universitetlərinin sıralamasına daxil edə biləcəyik."