“Uzun illərdir təhsil sistemində, Xəzər Universitetində İctimai əlaqələr və media üzrə direktor, eləcə də Həmkarlar İttifaqının sədri kimi müxtəlif ictimai vəzifələrdə fəaliyyət göstərirəm. 15-16 il bundan öncəki şagirdlərlə indiki universitetə qədəm qoyan gəncləri müqayisə edərkən böyük bir fərq görürəm və buna çox sevinirəm”.
Bu sözləri “Tehsil365”ə açıqlamasında Xəzər Universitetinin İctimai əlaqələr və media üzrə direktoru Əlövsət Əmirbəyli bildirib.
Ə.Əmirbəyli gənclərin nizam-intizamı və təhsilə olan həvəsini xüsusi vurğulayıb:
“Səmimi söyləmək istəyirəm, indiki gənclərdən böyük məmnunluğum var. Əsasən də yeni orta məktəbi bitirmiş uşaqların əksəriyyəti həddindən artıq intizamlıdırlar, fərqlənmək, öyrənmək və çox şey bilmək istəyirlər. Nizamlıdırlar o mənada ki, böyüklərin fikirilərini qəbul edir, öyrənir və bu fikirilərin əsasında da öz işlərini qurmağa çalışırlar. Öncəki illərdə gələn şagirdlərdə aqressiya, əmlaka ziyan vurma halları var idisə, indikilərin dərsə və elmə böyük meylləri var”.
Ekspert gənclərin özünüinkişaf və ictimai fəallıq baxımından da fərqləndiyini qeyd edib:
“Ən böyük fərqlərdən biri də odur ki, indiki gənclər öyrənməyə daha çox meyllidir. Onlar təkcə universitetin verdiyi akademik təhsillə kifayətlənmirlər; əlavə ictimai işlər görmək, müxtəlif qruplarda aktivlik etmək, sertifikatlar almaq və özlərini gələcək karyeralarına hazırlamaq kimi təşəbbüslərlə çıxış edirlər. Bu da bizi bir pedaqoq kimi çox sevindirir. Gənclərimizin bu potensialından məmnunam və bu inkişafın bundan sonra da davam etməsini arzulayıram”.