“Bir ilahiyyatçı kimi bildirirəm ki, əgər məktəblərdə geyim mövzusu ilə bağlı verilən qərar qız uşaqlarının məktəbə hicabla gəlməsini qadağan edərsə, hələ ki, medianın iddiasıdır, RUSİYA, GÜRCÜSTAN, FRANSA, ALMANİYA, NORVEÇ, İSVEÇ və sair kimi XRİSTİAN OLAN DÜNYƏVİ və DEMOKRATİK ölkələrdə belə bir qadağa olmamasını əsas gətirərək cəmiyyətimizdə İSLAMAFOBİYANIN tərkib hissəsi kimi başa düşüləcək və cəmiyyətin haqlı narazılığına səbəb olacaq. Xatırladım ki, qərb ölkələrində sifətin görünməsinə maneə olan niqab qadağan olunub, hicab yox”.
Bu sözləri “Tehsil365”ə açıqlamasında ilahiyyatçı Fazil Əhməd bildirib.
İlahiyyatçı bildirib ki, bu qərar Konstitusiyaya və demokratik dəyərlərə zidd nəticələrə gətirib çıxarmamalıdır.
“Tövsiyə edirəm ki, bu qərar Konstitusiyamıza daban-dabana zidd olan, demokratik dəyərlərə daban-dabana zidd olan nəticələrə gətirib çıxaran qadağalarla nəticələnməsin”.
Onun sözlərinə görə, hicab qadağası cəmiyyət və dövlət arasında uçuruma səbəb ola bilər:
“Əgər bu qərar hicab qadağası ilə müşaiyət olunsa, cəmiyyətdə xeyli insanın narazılığı ilə qarşılaşacaq. Narazı insanlar da fərqli formada fikir yürüdürlər. Kimisi mənim kimi, öz fikrini normal dinc formada ifadə edir. Kimisi isə təbii olaraq hisslərə qapılaraq fikirlərini radikal formada ifadə edəcək və övladının təhsil almaq hüququnun pozulması kiçik bir məsələ olmadığı üçün birmənalı qarşılanmayacaq.
Əgər bu qərar hicab qadağası ilə müşaiyət olunsa xarici media vasitələri, eləcə də Azərbaycanın qoşulduğu İslam tərəfdaşlıq ittifaqı ölkələrinin müxtəlif dairələri tərəfindən kəskin tənqidə səbəb olacaq.
Müxalifət mövqeyində olan bir çox xarici və daxili təşkilatlar, bloqerlər, yazarlar, jurnalistlər Azərbaycanda hüquq və azadlıqların pozulması mövzusunda KƏSKİN ÇIXIŞLAR edəcəklər.
Bütün bunlar CƏMİYYƏT İLƏ DÖVLƏT arasında uçuruma və öz dövlətinə qarşı səbəbsiz nifrətin yaranması ilə müşaiyət olunacaq”.
Ekspert vurğulayıb ki, heç bir ciddi səbəb olmadan belə bir qərarın verilməsi xarici qüvvələrin təsiri kimi qiymətləndirilə bilər:
“Biz bilirik ki, hər bir verilən qərar baş vermiş hər hansı hadisə və motiv üzərindən verilir. Bu qərar əgər hicab qadağası ilə müşaiyət olunarsa ortada bir ciddi səbəb, motiv olmadığı üçün həm də bir çoxları tərəfindən XARİCİ QÜVVƏLƏRİN TƏSİRİ nəticəsində qəbul olunmuş qərar kimi dəyərləndirilə bilər. Çünki, doğrudan da heç bir insident, arqument olmadan hicab məktəblərdə hicab qadağasına dair qərar verilməyə səbəb olarsa belə bir qərarın günün günorta çağı verilməsi HANSI ZƏRURƏTDƏN DOĞUR sualı yaradacaq.
Yenə də ümid edirəm ki, verilən qərar hicab məsələsini əhatə etməyəcək və dövlətimizin son illərdə nümunə olduğu tolerantlıq və multikultural dəyərləri tapdalayan addımlara səbəb olmayacaq”.