“Buraxılış imtahanlarında 4 səhv cavabın 1 düzgün cavabı aparması qaydasının tətbiqi ilə bağlı müzakirələr davam edir. Təhsil eksperti Məzahir Məmmədli bu qaydanın tətbiqinin müəyyən üstünlükləri ilə yanaşı, məktəblər və müəllimlər üçün müəyyən risklər yarada biləcəyini düşünür”.
Bu sözləri “Tehsil365”ə açıqlamasında təhsil eksperti Məzahir Məmmədli deyib.
Ekspert bildirib ki, hazırda məktəb rəhbərləri və sinif rəhbərləri arasında da buraxılış imtahanlarında 4 səhv cavabın 1 düzgün cavabı aparması qaydasına ehtiyatlı yanaşanlar var. Onun sözlərinə görə, bunun əsas səbəblərindən biri məktəblər arasında reytinq sisteminin mövcud olması və xüsusilə IX sinif buraxılış imtahanlarının nəticələrinin məktəblərin göstəricilərinə təsir etməsidir.
M.Məmmədli qeyd edib ki, şagirdlərin buraxılış imtahanındakı nəticələri müəyyən mənada məktəbin və müəllimin fəaliyyətinə də təsir göstərir. Ekspertin fikrincə, şagird imtahan nəticələrinin gələcəyi üçün əhəmiyyət daşımadığını düşünərsə, bu, onun dərsə davamiyyətinə və tədris mühitinə də mənfi təsir göstərə bilər.
“4 səhv cavabın 1 düzgün cavabı aparması” qaydasına münasibət bildirən ekspert bunun bilikli və hazırlıqlı şagirdlərin digər şagirdlərdən fərqlənməsinə imkan yarada biləcəyini düşünür:
“Bu qaydanın tətbiqi müəyyən mənada ‘atıb-tutmaqdan’ çəkindirə bilər. Belə olan halda bilikli, bacarıqlı və savadlı şagirdlər digərlərindən daha aydın şəkildə fərqlənə bilərlər”.
Bununla belə, ekspert hazırkı mərhələdə məsələyə ehtiyatla yanaşdığını bildirib. Onun sözlərinə görə, belə bir dəyişiklik məktəblər və müəllimlər üzərində əlavə stress və gərginlik yarada bilər.
“Bu məsələ konseptual şəkildə geniş müzakirə olunmalıdır. Ən azı məktəb rəhbərlikləri, sinif rəhbərləri, bəzi hallarda isə şagirdlərin də iştirakı ilə müzakirələr aparılmalı və vahid qərar qəbul edilməlidir”, – deyə M.Məmmədli vurğulayıb.
Ekspert hesab edir ki, hazırkı vəziyyətdə buraxılış imtahanlarında bütün hallarda 4 səhv cavabın 1 düzgün cavabı aparması qaydasının tətbiqinə tələsmək düzgün olmaz. O qeyd edib ki, belə bir dəyişiklik məktəblərin nüfuzuna və müəllimlərin imicinə də təsir göstərə bilər.