Azərbaycan tarixinin mühüm mərhələlərindən biri olan monqollar dövrünün araşdırılmasına həsr olunmuş yeni elmi əsər nəşr olunub. AMEA-nın akademik Z.M.Bünyadov adına Şərqşünaslıq İnstitutunun Elmi şurasının qərarı ilə “Azərbaycan tarixşünaslığında monqollar dövrü (XIII–XIV əsrlər)” adlı monoqrafiya işıq üzü görüb. Tədqiqat əsərində həmin dövrün siyasi, sosial-mədəni, hüquqi və iqtisadi prosesləri, eləcə də tarixi mənbələr geniş şəkildə təhlil edilib.
“Tehsil365”xəbər verir ki, AMEA-nın akademik Z.M.Bünyadov adına Şərqşünaslıq İnstitutunun Elmi şurasının qərarı ilə "Azərbaycan tarixşünaslığında monqollar dövrü (XIII–XIV əsrlər)" monoqrafiyası işıq üzü görüb.
İnstitutdan AZƏRTAC-a bildirilib ki, monoqrafiyanın rəyçisi və elmi redaktoru akademik Nərgiz Axundova, redaktoru Aynurə Kərimovadır. Tədqiqat əsərinin "Monqol dövrü tarixşünaslığının başlıca problemləri və təsviri" adlı birinci hissəsi tarix üzrə fəlsəfə doktoru Bayram Quliyev, "Monqol imperiyası dövründə Azərbaycanda elm və mədəniyyət (XIII-XIV əsrlər)" adlı ikinci hissəsi professor Məryəm Seyidbəyli, "Monqol istilaları ərəfəsində və Elxanilər dövründə Azərbaycanda sosial-mənəvi həyat" adlı üçüncü hissəsi Elxan Quliyev, "Monqol imperiyası dövründə Azərbaycanda hüquq sistemi" adlı dördüncü hissəsi Zaur Məmmədov, "Monqol imperiyası dövrünün yazıları" adlı beşinci hissəsi Solmaz Namazova, "Monqol imperiyası dövründə İpək yolu və ticarət" adlı altıncı hissəsi Röya Mirzəbəyova, "Monqol istilaları dövründə Azərbaycanın ərəb və fars mənbələrində təsviri" adlı yeddinci hissəsi Novruz Nuriyev tərəfindən hazırlanıb.
Əsərdə Monqol imperiyası dövründə Azərbaycanda elm və mədəniyyət, hüquq sistemi, monqol istilaları dövründə mənəvi həyat, eləcə də digər mühüm tarixşünaslıq məsələləri geniş şəkildə araşdırılıb. Həmçinin XIII əsrdə Azərbaycanda baş verən etnik proseslər və dini görüşlər, Monqol imperiyası dövrünün yazıları, bu dövrün Azərbaycan iqtisadiyyatının tarixi vəziyyəti (Böyük İpək yolu və ticarət), habelə monqol istilalarına dair ərəb və farsdilli tarixi qaynaqların Azərbaycan tarixşünaslığındakı əhəmiyyəti də təhlil edilib. Monoqrafiyanın tərtibi zamanı orta əsrlər dövrü əlyazma qaynaqları və müxtəlif dillərdə mövcud olan qədim və müasir mənbələrdən geniş istifadə olunub.
Monoqrafiya Azərbaycan və Şərq tarixşünaslığı ilə məşğul olan mütəxəssislər və tarixin tədrisini həyata keçirən elmi müəssisələr tərəfindən elmi mənbə kimi istifadə oluna bilər.