Dövlət İmtahan Mərkəzində (DİM) oktyabrın 26–30-da Azərbaycan dili, ingilis dili, informatika, kimya, fizika, rus dili, biologiya, coğrafiya və riyaziyyat fənləri üzrə elmi-metodik seminarlar təşkil olunub.
“Tehsil365” xəbər verir ki, seminarlarda buraxılış və qəbul imtahanlarının proqramları, eləcə də imtahan modelinə uyğun tapşırıq nümunələri müzakirə edilib.
Müzakirələrdə orta və ali təhsil müəssisələrinin müəllimləri, metodistlər, həmçinin Azərbaycan Milli Elmlər Akademiyasının və Elm və Təhsil Nazirliyinin tabeliyindəki institutların mütəxəssisləri iştirak ediblər. Bölgələrdə çalışan müəllimlər isə DİM-in regional bölmələri vasitəsilə onlayn qoşulublar.
Seminarlar çərçivəsində riyaziyyat və ingilis dili fənləri üzrə 11 illik təhsil səviyyəsinin buraxılış imtahanlarına aid proqram və tapşırıq nümunələri müzakirə edilərək təsdiqlənib.
Bundan əlavə, Azərbaycan dili, kimya, fizika və coğrafiya fənləri üzrə müxtəlif ixtisas qruplarına aid qəbul imtahanı proqramları da iştirakçıların ümumi qərarı ilə təsdiq olunub.
İnformatika və biologiya fənləri üzrə isə qəbul imtahanı modelinə uyğun tapşırıqların mövzusu, məzmunu, mürəkkəblik dərəcəsi və kurikulum tələblərinə uyğunluğu nəzərdən keçirilib.
Təsdiqlənən proqram və tapşırıq nümunələrinin “Abituriyent” jurnalının müvafiq xüsusi buraxılışlarında dərc olunacağı bildirilib.
Qeyd edək ki, seminarlarda müzakirələr növbəti həftə də davam etdiriləcək.