23 iyul – 2 avqust tarixlərində İordaniyanın qədim Caraş şəhərində Kral II Abdullahın himayəsi altında, İordaniya Mədəniyyət Nazirliyinin təşkilatçılığı ilə 39-cu Caraş Beynəlxalq Mədəniyyət və İncəsənət Festivalı keçirilir.
“Tehsil365” xəbər verir ki , Azərbaycan Respublikası Mədəniyyət Nazirliyinin dəstəyi ilə beynəlxalq festivalda Azərbaycan Milli Konservatoriyasının “Xalq çalğı alətləri” kafedrasının müəllimi, istedadlı tarzən İbrahim Babayevin rəhbərlik etdiyi musiqi qrupu, həmçinin Azərbaycan Dövlət Rəqs Ansamblının solistləri ölkəmizi yüksək səviyyədə təmsil edirlər.
Festival çərçivəsində 28 iyul tarixində qədim Caraş şəhərinin mərkəzi meydanında konsert proqramı təşkil olunub.
Konsert zamanı tarzən İbrahim Babayevin rəhbərliyi ilə hazırlanmış “MughaMix” adlı musiqi layihəsinin təqdimatı baş tutub. Proqramda Anar Vəlizadə, Vəfadar Ramiz və İbrahim Babayevin ifasında Üzeyir Hacıbəylinin “O olmasın, bu olsun” musiqili komediyasından “Fantaziya”, H. Həsənovun “Unuda bilmirəm” əsəri, eləcə də “Xarıbülbül” və “Sarı gəlin” kimi Azərbaycan xalq mahnıları səsləndirilib. Bununla yanaşı, konsertdə İbrahim Babayevin müəllifi olduğu “MughaMix”, “Dance in the Sky” və “17.17” adlı əsərlər də təqdim olunub.
Yüksək peşəkarlıqla təşkil edilmiş bu musiqi proqramı tamaşaçılar tərəfindən böyük rəğbətlə və alqışlarla qarşılanıb.
Hazırda davam edən festival çərçivəsində 35 ölkədən gəlmiş iştirakçıların təqdimatında 230-dan artıq mədəni tədbirin keçirilməsi nəzərdə tutulur. Festival proqramına müxtəlif xalqların musiqi və folklor ansambllarının çıxışları, təsviri sənət sərgiləri, xəttatlıq nümunələri, ədəbiyyat və poeziya günləri daxildir.
