Son günlər sosial mediada yayılan və Filippin Ali Təhsil Komissiyası (CHED) tərəfindən verildiyi iddia edilən bildiriş, bu ölkədə tibb təhsili almağı planlaşdıran Hindistanlı tələbələr arasında böyük maraq yaradıb. Sənəddə Filippindəki Tibb Doktoru (MD) proqramının Hindistanın Milli Tibb Komissiyasının (NMC) 2021-ci il Xarici Tibb Lisensiyası (FMGL) qaydalarına uyğun olduğu qeyd edilir. Lakin Filippin Səhiyyə Nazirliyi tələbələri rəsmi açıqlamanı diqqətlə oxumadan hərəkət etməməyə çağırır.
"Tehsil365" xəbər verir ki, bu barədə "Education Times" məlumat yayıb . Bəzi akademik məsləhətçilər Filippini Hindistan tərəfindən tanınan tibb təhsili məkanı kimi təqdim etsə də, onlar tələbələri FMGE və ya NExT imtahanlarına uyğunluq məsələsində tam və dəqiq məlumatlandırmırlar. 1959-cu il Filippin Tibb Qanununa görə, bu sahədə hələ də qeyri-müəyyənlik qalır və CHED-in 15 iyul 2025-ci il tarixli bildirişi Hindistanda tam hüquqi keçərliliyə malik deyil.
Hindistanın Səhiyyə Nazirliyindən adı açıqlanmayan bir rəsminin "Education Times"a bildirdiyinə görə, "Əgər tələbə FMGL qaydalarına uyğun bir ölkədə tibb təhsilini tamamlayıbsa, Hindistanda tibb üzrə imtahanlara girmək hüququ avtomatik təmin olunur. Lakin hər bir tələbəyə xaricdə təhsil almaq qərarı verməzdən əvvəl qaydaları diqqətlə araşdırmaq tövsiyə olunur".
CHED-in sosial mediada yayılmış bildirişinə səbəb isə Filippində fəaliyyət göstərən bir hüquq firmasının CHED-ə rəsmi akkreditasiya olunmuş tibb universitetlərinin Hindistan qaydalarına uyğunluğunu təsdiqləməyi təklif etməsi olub. Lakin CHED-in rəsmi saytında belə bir sənəd yerləşdirilməyib.
Hazırda Filippində təhsil alan Hindistanlı tələbələr narahatdırlar. Emilio Aguinaldo Kollecində oxuyan ikinci kurs tələbəsi bildirir ki, “2021-ci ildən sonra NMC Hindistana qayıdaraq həkim kimi fəaliyyət imkanlarımızı məhdudlaşdırdı. Bu diplomu faydalı etmək üçün ya ABŞ, ya Avstraliya imtahanlarını keçmək lazımdır”.
Filippin qanunvericiliyinə görə, əcnəbi tələbələr yalnız onların ölkəsi Filippin vətəndaşlarına eyni hüquqları tanıyırsa və 12 aylıq staj keçiblərsə, PLE (Filippin Həkimlik İmtahanı) imtahanına girə bilərlər.
CHED bildirir ki, təqdim olunan proqramların beynəlxalq səviyyədə tanınması üçün qurum səylə çalışır. Qeyd olunur ki, qanunvericilikdə nəzərdə tutulan dəyişikliklər hələ Filippin Senatında müzakirə olunur. Əgər dəyişikliklər qüvvəyə minərsə, Filippində tibb üzrə təhsil alan Hindistanlı tələbələr PLE imtahanına daxil ola biləcəklər.
Hazırda tələbələr rəsmi təsdiqlərin və qanun dəyişikliklərinin həyata keçməsini gözləyirlər.