Türkiyənin Milli Təhsil Nazirliyinin (MEB) məktəblərdə sərbəst geyim tətbiqini ləğv edərək yenidən forma qaydasına keçməsi, vətəndaşlar tərəfindən məmnuniyyətlə qarşılanıb. 2025–2026-cı tədris ilindən etibarən məktəblərdə yenidən forma geyimi tətbiq ediləcək.
"Tehsil365" TRT Haber-in verdiyi məlumata əsasən bildirir ki, bu qərara görə valideynlər Prezident Administrasiyası yanında fəaliyyət göstərən CİMER-ə müraciət edərək təşəkkürlərini bildiriblər. Nazirlik bildirib ki, yeni forma sistemi sadə, rahat, sağlamlıq və pedaqoji prinsiplərə uyğun olacaq. Valideynlərə əlavə maliyyə yükü yaratmamaq məqsədilə xüsusi dizaynda geyimlər tələb olunmayacaq.
Qaydalar çərçivəsində məktəb–valideyn birlikləri forma satışı ilə məşğul ola və ya valideynləri müəyyən mağazalara yönləndirə bilməzlər. Xüsusi gün və tədbirlər üçün məcburi paltar tələbi qoyulmayacaq. Atelye və laboratoriya kimi xüsusi sahələrdə isə məktəb rəhbərliyinin təsdiqi ilə iş geyimi istifadə oluna bilər.
Yeni qaydalara əsasən:
Hər məktəb öz formasını rahat və davamlı olacaq şəkildə müəyyən edəcək.
Pambıq və yun kimi materiallardan istifadə olunacaq.
Formanın dizaynı uşaqların fiziki inkişafını məhdudlaşdırmayacaq.
Eyni məktəb forması ən azı 4 il dəyişilmədən istifadə ediləcək.
Hazır simvollar (loqo, rozet və s.) məcburi olmayacaq və valideynlər formaları istədikləri mağazadan ala biləcəklər.
Rəsmi açıqlamada bildirilir ki, bu addım məktəblərdə həm şagird sağlamlığına, həm də təhsil mühitində bərabərlik və nizam-intizamın gücləndirilməsinə xidmət edəcək.
Qərar ictimaiyyət tərəfindən də müsbət qarşılanıb. Valideynlərdən biri CİMER-ə yazdığı mesajda “Forma qaydası çox doğru bir qərardır. Sərbəst geyimdə ailələr uşaqlar üçün paltar tapmaqda çətinlik çəkirdi”, – deyə bildirib.
Başqa bir vətəndaş isə “Məktəblərdə formaya dönüş məni müəllim kimi çox sevindirdi. Fərqli təhsil pillələri üçün dizayn müsabiqələri də təşkil oluna bilər”, – fikrini ifadə edib.
Valideynlərin ümumi fikri isə belədir: “Sərbəst geyim uşaqlar arasında maddi fərqləri ön plana çıxarır və psixoloji təzyiq yaradırdı. Formaya qayıdış məktəbdə bərabərliyi və intizamı bərpa edəcək”.