İngiltərə və Uelsdə məktəblərin yoxlanılması ilə bağlı yeni təkliflər təhsil ictimaiyyətində ciddi narahatlıq doğurub. Təkliflərin rəsmi olaraq Ofsted rəhbərliyi tərəfindən təsdiqlənməsinə bir neçə gün qalmış, məktəb rəhbərləri və Təhsil Nazirliyinin (DfE) nümayəndələri tərəfindən bu təkliflər "üzə çıxarılmamış, qeyri-müəyyən və dövrün tələblərinə uyğun olmayan" adlandırılıb.
“Tehsil365" The Guardian-a istinadən xəbər verir ki, yeni sistemə əsasən, məktəblərin qiymətləndirilməsində istifadə olunan dərəcələrin adları dəyişdirilir, dəyərləndirmə sahələrinin sayı isə 9-dan 7-yə endirilir. “Qeyri-kafi” kimi kəskin ifadələrin ləğvi və əvəzində “təcili inkişaf tələb olunur” kimi daha yumşaq terminlərin istifadəsi nəzərdə tutulur. Bundan əlavə, məktəb hesabatlarında rəng kodları da dəyişdirilərək “ən yüksək qiymət” mavi rənglə göstəriləcək.
Ofsted bu dəyişikliklərin Ruth Perry-nin 2023-cü ildə intiharından sonra ictimaiyyətin tənqidlərinə cavab olduğunu bildirir. Qeyd edək ki, Perry-nin ölümündə Ofsted yoxlamasının psixoloji təsiri olduğu iddia edilmişdi.
Bununla belə, məktəb rəhbərləri və müəllim birlikləri bu dəyişiklikləri “kosmetik” adlandırır və əsl problemləri həll etmədiyini vurğulayırlar. Bir çox ekspertlər yeni qiymətləndirmə sistemindəki dilin qeyri-müəyyən və tətbiqi çətin olduğunu deyir. “Çoxlu anlaşılmaz ifadələr var. Bunların praktikada necə işləyəcəyini təsəvvür etmək çətindir”, – deyə bir məktəb direktoru bildirib.
Təhsil Nazirliyi isə yeni çərçivənin ölkədə xüsusi təhsil ehtiyacları olan uşaqlarla bağlı islahatlarla üst-üstə düşmədiyinə dair narahatlığını ifadə edib. Nazirlik bildirir ki, bəzi məktəblər yüksək qiymət almaq üçün bu tipli şagirdləri qəbul etməkdən yayınırlar.
Ofsted sözçüsü isə rəsmi qərarların sentyabr ayında açıqlanacağını bildirib və hökumətlə fikir ayrılığı olmadığını qeyd edib: “Təkliflərə əsaslanan rəy və dəyişikliklər ictimai məsləhətləşmənin nəticəsi olaraq sentyabrda təqdim olunacaq.”
Yeni sistemin noyabr ayından qüvvəyə minməsi gözlənilir. Lakin məktəb rəhbərləri və direktorlar assosiasiyası bu zaman qrafikini “qəbuledilməz” adlandıraraq bunun həm müəllimlərin iş yükünü artıracağını, həm də ruh sağlamlıqlarına mənfi təsir edəcəyini vurğulayıblar.
Ofsted ilə təhsil sektorunun münasibətləri hazırda gərgindir. Ruth Perry-nin bacısı Julia Waters son dəyişiklikləri “sistemin kökündəki problemləri ört-basdır edən cəhd” adlandırıb.