Böyük Britaniyada ali təhsil sektorunda davam edən maliyyə böhranı ölkədəki universitetləri ciddi dəyişikliklərə vadar edir. Ekspertlərin fikrincə, bu çətin dövr ağrılı olsa da, nəticədə daha dayanıqlı və uyğunlaşa bilən təhsil sisteminin yaranmasına səbəb ola bilər.
"Tehsil365" Times Higher Education-un yaydığı məlumata görə bildirir ki, PA Consulting-in universitet rəhbərləri arasında keçirdiyi sorğuya əsasən, rektorlar və rəhbər heyət üzvləri artıq dövlətin müdaxiləsini gözləmədən, gələcək strategiyalarını özləri müəyyənləşdirməyə başlayıblar. Əvvəllər universitetlər gəlirlərini əsasən xarici tələbələrdən gözləyirdisə, indi əksəriyyəti tələbə qəbulunu azaltmaq və daha sabit maliyyə mənbələrinə yönəlmək qərarına gəlib.
Universitetlər indi daha real yanaşma sərgiləyir və xərclərin azaldılması, strukturun yenidən qurulması kimi tədbirlərlə əməliyyat səmərəliliyini artırmağa çalışırlar. Bu isə bəzi hallarda ixtisarlar və proqramların ləğvi ilə nəticələnir. Lakin mütəxəssislər xəbərdarlıq edirlər ki, universitetlər yalnız qısa müddətli qənaət üçün deyil, uzunmüddətli struktur problemləri həll etməyə yönəlik addımlar atmalıdır.
Sorğunun nəticələri göstərir ki, əmək bazarında yüksək tələb görən ixtisaslara və onlayn təhsilə maraq artır. Bu isə təhsil müəssisələrinin daha çevik və texnologiyaya əsaslanan yanaşmalar tətbiq etməsini zəruri edir. Süni intellekt və rəqəmsal həllər bu sahədə mühüm rol oynaya bilər.
Universitetlər arasında əməkdaşlıq, məsələn, arxa ofis xidmətlərinin birləşdirilməsi və ya dərs proqramlarının bölgələr üzrə koordinasiyası kimi addımlar da potensial qənaət və səmərəlilik gətirə bilər. Lakin bəzi rəhbərlər bu yanaşmalara hələ də ehtiyatla yanaşır, çünki təşkilati, mədəni və hüquqi çətinliklər qalmaqdadır.
Ali təhsil sisteminin öz daxilindəki mürəkkəblik, universitetlərin yerli hökumət və icmalarla əlaqələrini çətinləşdirir. Mövcud rəqabət əsaslı maliyyələşmə modeli isə universitetləri əməkdaşlıqdan daha çox öz maraqlarını qorumağa vadar edir.
Bununla belə, hökumətin "Ömürboyu öyrənmə hüququ" kimi təşəbbüsləri və regionlara verilən iqtisadi səlahiyyətlər, ali məktəblər üçün əməkdaşlığı təhlükə deyil, strateji üstünlüyə çevirə bilər.
Ekspertlər bildirir ki, hazırkı dəyişikliklər qısa müddətdə ağrılı olsa da, uzun müddətli perspektivdə tələbələr və cəmiyyət üçün daha faydalı və dayanıqlı ali təhsil sektorunun formalaşmasına səbəb ola bilər.