İngiltərənin cənub-şərqində yerləşən beş universitetə beynəlxalq akademik istedadları cəlb etmək üçün 10 milyon funt sterlinq ayrılması, ölkənin şimalındakı universitetlərdə narazılığa səbəb olub. Hökumətin 54 milyon funt sterlinqlik “qlobal istedad fondu” çərçivəsində seçilən 12 ali təhsil müəssisəsi arasında şimal bölgələrindən heç bir universitetin yer almaması tənqidlərə yol açıb.
"Tehsil365" xəbər verir ki, bu barədə The Guardian məlumat yayıb ki, Oxford, Cambridge və Imperial College London kimi nüfuzlu “qızıl üçbucaq” universitetləri ilə yanaşı, daha iki cənub-şərq universitetinə də bu vəsaitin verilməsi, hökumətin “bölgələrarası tarazlığı təmin etmək” məqsədi ilə ziddiyyət təşkil etdiyi bildirilir.
İşçi Partiyasının deputatı və Parlamentin Elm və Texnologiya Komitəsinin rəhbəri Chi Onwurah, elm naziri Lord Vallance-dan bu seçimin arxasındakı meyarları izah etməsini tələb edib. Onun sözlərinə görə, verilən qərar “nə sübuta, nə regional siyasətə, nə də elmi analizə əsaslanır”.
Müstəqil hökumət qurumu olan Birləşmiş Krallıq Tədqiqat və İnnovasiya Şurası (UKRI) tərəfindən idarə olunan fondun, xüsusilə Manchester, Leeds, Newcastle və Durham kimi güclü tədqiqat profillərinə sahib universitetləri kənarda qoyması “açıq-aşkar ədalətsizlik” adlandırılıb.
Northern Powerhouse Partnership düşüncə qurumu isə bildirir ki, şimal universitetləri mövcud kriteriyaların əksəriyyətini ödəməsinə baxmayaraq, “böyük universitetlərin beynəlxalq işçi kvotasına görə texniki olaraq sıradan çıxarılması” ciddi problemlər yaradır. Məsələn, Manchester Universiteti sadəcə 0.3% fərqlə bu kvotanı keçə bilməyib.
Tərəfdarların fikrincə, fondun əsl məqsədi alqışa layiq olsa da, onun tətbiq forması İngiltərənin şimalında innovasiyanı zəiflədir.
Hökumət isə cavabında bildirib ki, seçim “ölçülə bilən kriteriyalar” əsasında aparılıb və şimal bölgələrinə dəstək məqsədilə innovasiya və tədqiqat sahələrinə ümumilikdə 22.6 milyard funt sterlinq yatırılıb.